Privacy, Safety, and Policy Hub
Regoli tal-Komunità

Fastidju u Bullying

Sensiela ta' Taħriġ dwar ir-Regoli tal-Komunità

Aġġornat: Jannar tal-2023

Ħarsa ġenerali

Il-bullying u l-fastidju mhux posthom fuq Snapchat. Dax-xorta ta' ħsarat jistgħu jieħdu għadd ta' xeħtiet u għalhekk, biex innaqqsu dar-riskji b'mod dinamiku u minn għadd ta' postijiet, għaqqadna l-politiki tagħna mal-ħarsien mibni fis-servizzi tagħna nfushom u ma' riżorsi għall-utenti.

Bħala standard, il-politiki tagħna jħarsu l-membri kollha tal-komunità tagħna minn kontenut li jbaxxi, li hu malafamanti jew li jiddiskrimina kontra ħaddieħor. Lanqas ma tista' taqsam informazzjoni privata jew Snaps tan-nies mingħajr l-għarfien jew il-kunsens tagħhom.

Minbarra li nwettqu dawn il-politiki b'mod konsistenti, aħna nużaw id-disinn tas-servizzi tagħna biex jgħinna nillimitaw għemil li jagħmel il-ħsara li jista' jikser dawn ir-regoli. Fosthom hemm is-Settings standard li ż-żewġ naħat jeħtiġilhom jaċċettaw talba għall-ħbiberija qabel ikunu jistgħu jibagħtu l-messaġġi lil xulxin u li ngħarrfu lill-utenti meta xi ħadd jieħu ritratt tal-iskrin tal-iSnaps privati, tal-messaġġi u tal-profili.

Permezz tal-faċilitajiet ta' Here for You tagħna, aħna ngħinu niżguraw li l-utenti għandhom aċċess għar-riżorsi fl-app u l-informazzjoni li jeħtieġu biex jagħrfu u jkunu jafu kif għandhom iġibu ruħhom jekk iħabbtu wiċċhom mal-bullying u l-fastidju. Nipprovdu wkoll għodod biex niżguraw li kwalunkwe imġiba li tikser ir-regoli ta' Snapchat tista' tiġi rrappurtata b'mod faċli.

  • Ma naċċettaw l-ebda xorta ta' bullying u fastidju. Dan jestendi għal kull forma ta' fastidju sesswali, fosthom li tibgħat stampi sesswalment espliċiti, xennieqa, senswali jew għera lill-utenti oħra. Jekk xi ħadd jimblukkak, ma tistax tipprova tikkuntattjah minn kont ieħor.

  • Ma tistax taqsam informazzjoni privata ta' xi ħadd ieħor jew Snaps ta' nies fi spazji privati bħal, ngħidu aħna, kamra tal-banju, kamra tas-sodda, kamra għat-tibdil tal-ilbies jew f'xi faċilità għall-kura tas-saħħa mingħajr l-għarfien u l-kunsens tagħhom.

  • Jekk xi ħadd jidher fuq is-Snap tiegħek u jitolbok tneħħi l-iSnap, jekk jogħġbok neħħiha! Irrispetta l-jeddijiet tal-privatezza tal-oħrajn.

X'għandek tistenna

Fost dak li jitqies ksur tal-politiki kontra l-fastidju u l-bullying tagħna hemm l-imġiba mhux mixtieqa li tista' twassal biex persuna ordinarja tħossha emozzjonalment mweġġgħa. Dan jiġbor fih it-tgħajjir, it-theddid jew it-twaqqigħ għaż-żufjett ta' utenti oħra u kull imġiba oħra maħsuba biex twaqqa' għaċ-ċajt lil xi ħadd ieħor.

Dawn ir-regoli ma jaċċettaw l-ebda xorta ta' fastidju sesswali. Fost oħrajn, b'fastidju sesswali nifhmu kummenti mhux mixtieqa li juru interess sesswali, il-qsim ta' kontenut grafiku mhux mixtieq u mhux mitlub jew talbiet jew stediniet oxxeni lil utenti oħra. Ma nittolleraw l-ebda qsim ta' ritratti intimi mingħajr il-kunsens tal-persuna––fosthom ritratti u filmati sesswali meħuda jew maqsuma mingħajr permess, kif ukoll “pornografija tat-tpattija” jew imġiba li thedded li taqsam, tisfrutta jew tikxef ir-ritratti jew il-filmati intimi ta' xi ħadd mingħajr il-kunsens tiegħu.

Dawn ir-regoli jitolbu wkoll li l-utenti jirrispettaw il-privatezza personali ta' xulxin. Biex ma jiksrux dal-politiki, utenti m'għandhomx jieħdu ritratti jew filmati tan-nies mingħajr il-permess tagħhom u m'għandhomx jaqsmu l-informazzjoni privata dwar nies oħra bħal, ngħidu aħna, l-indirizz tad-dar, id-data tat-twelid, in-numri tal-mowbajl, eċċ. Jekk xi ħadd jitolbok tneħħi ritratt jew informazzjoni dwaru, jekk jogħġbok neħħihom!

Aħna nħeġġu lill-utenti jressqu rapporti meta jħabbtu wiċċhom ma', jew jinnutaw, xi ksur ta' dawn ir-regoli. It-timijiet tal-għarbiel tagħna jaħdmu biex jiżguraw li kull utent iħossu komdu u sigur hu u juża Snapchat. Meta l-utenti jirrappurtaw imġiba ħażina, ikunu qed jgħinuna nilħqu dak l-għan.

Għeluq

L-għan tagħna huwa li nrawmu komunità sigura fejn l-iSnapchatters jistgħu jesprimu ruħhom u għalhekk ma naċċettaw l-ebda xorta ta' fastidju u bullying. Il-bullying u l-fastidju jistgħu jieħdu ħafna forom u għalhekk l-għan tagħna huwa li nqisu kif iħossuhom l-utenti huma u jużaw il-pjattaforma tagħna.

Jekk jogħġbok dejjem qis id-dinjità u l-privatezza ta' nies oħra––jekk juruk li mhux komdi b'xi ħaġa, irrispetta l-limiti tagħhom; jekk jitolbuk tneħħi xi kontenut dwarhom, jekk jogħġbok neħħih––u bħala regola ġenerali, taqsamx ritratti tan-nies jew informazzjoni dwarhom mingħajr il-permess tagħhom. Jekk xi darba ma tħossokx komdu/a, tiddejjaqx tressaq rapport u timblokka lill-utent l-ieħor––dawn il-faċilitajiet qiegħdin hemm għas-sigurtà tiegħek.

Aħna impenjati li kontinwament naddattaw il-ħidma tal-politiki tagħna biex intejbu l-ħiliet tagħna li nilqgħu l-kontenut u l-imġibiet li jagħmlu l-ħsara. Għalkemm ir-rapporti tal-utenti jgħinuna nsaħħu l-ħidma tagħna, aħna impenjati li naħdmu ma' għadd ta' mexxejja mill-komunità tas-sigurtà biex niżguraw li qed niksbu dawn l-għanijiet b'mod responsabbli. Jekk jogħġbok żur values.snap.com/news għal iktar informazzjoni dwar il-ħidma fil-qasam tas-sigurtà tagħna.