Merħba fil-Politika tal-Privatezza ta' Snap Inc. Dil-Politika tfisser kif niġbru u nużaw id-dejta tiegħek u kif tista' tikkontrolla l-informazzjoni tiegħek. Qed tfittex taqsira ta' kif nieħdu ħsieb il-privatezza tiegħek? Agħti titwila lejn dil-paġna jew lejn dal-filmat. Jekk qed tfittex id-dettalji tal-privatezza ta' xi servizz partikolari bħal, ngħidu aħna, kif nipproċessaw it-Taħditiet u l-iSnaps tiegħek, agħti titwila lejn il-paġna Privatezza skont is-Servizz. Barra dad-dokumenti, se nagħtuk ukoll tagħrif fl-app b'iktar informazzjoni dwar il-prodotti u s-servizzi tagħna. Jekk tuża Nuċċali, tista' ssir taf iktar dwar kif niġbru u nużaw id-dejta tiegħek fil-Politika tal-Privatezza Miżjuda għal Nuċċali.

Għal Snap it-Trasparenza huwa wieħed mill-valuri ewlenin. Aħna nemmnu li kulħadd għandu jkun jaf ix-xorta ta' dejta li niġbru u kif nużawha — u għalhekk ngħidulek minnufih kif nipproċessawha. Fost l-għanijiet li għalihom nipproċessaw l-informazzjoni tiegħek hemm li nagħtuk esperjenza iktar personalizzata, fosthom li nuruk kontenut u informazzjoni addattata għall-esperjenza tiegħek, kif ukoll riklami iktar siewja għalik. Meta nifhmu dak li jinteressak u dak li tixtieq, inkunu nistgħu naddattaw is-servizz tagħna għalik aħjar.

Barra minn dan, aħna nemmnu li esperjenza personalizzata m'għandhiex tnaqqar mill-privatezza tiegħek. Bħalma jiġri fil-ħajja ta' veru, jaf ikun hemm xi drabi fejn tkun tixtieq taqsam xi ħaġa privatament biss mal-eqreb fost sħabek u drabi oħra fejn tkun tixtieq taqsam xi ħaġa ma' kulħadd. Għalhekk mill-bidu nett emminna li l-imġiba standard għandha tkun li nħassru l-kontenut u li nagħtu kontroll lill-iSnapchatters billi nagħtuhom l-għodod biex jagħżlu huma stess x'jiġri bil-kontenut tagħhom bħal, ngħidu aħna, ma min' għandu jinqasam u meta għandu jinżamm jew le.

Dil-Politika tgħodd għall-app ta' Snapchat tagħna kif ukoll għall-prodotti, is-servizzi u l-faċilitajiet l-oħra tagħna bħal Bitmoji, Nuċċali u l-ħidmiet tagħna marbuta mar-riklami u l-kummerċ. Il-kelma “Servizzi” f'dil-Politika qed tirreferi għal dawk kollha. Barra minn dan, kull darba li nsemmu r-“Regoli” tagħna, inkunu qed nirreferu għar-Regoli tas-Servizz li taqbel magħhom meta tirreġistra għas-Servizzi tagħna. Fl-aħħar nett, jekk issib il-kelma “Snapchatter”, ħafna drabi tkun qed tirreferi għal kull utent tas-Servizzi tagħna.

Ejja nibdew bil-kontroll li għandek fuq l-informazzjoni tiegħek:

Għal Snap importanti ħafna li jkollok il-kontroll fuq l-informazzjoni u s-settings tiegħek. Mill-app ta' Snapchat tista' ssib, tibdel u tħassar l-informazzjoni tiegħek, tagħżel min jista' jikkuntattjak u tniżżel id-dejta tiegħek. Hawn taħt nagħtuk iktar dettalji dwar it-tipi ta' settings li tista' tuża, nagħtuk ħolqa għall-għodda tat-tniżżil tad-dejta tagħna u nagħtuk l-istruzzjonijiet ta' kif tħassar id-dejta jew il-kont tiegħek.

Billi rridu li jkollok kontroll fuq l-informazzjoni tiegħek, se nagħtuk firxa ta' għodod, fosthom:

• Aċċessa u ibdel l-informazzjoni tiegħek. Tista' taċċessa u tibdel il-biċċa l-kbira tal-informazzjoni bażika tiegħek direttament mis-Servizzi tagħna. Kemm tiftaħ is-settings u ssib l-għażliet li tista' tagħżel.

• Ħassar l-informazzjoni tiegħek. Jekk tixtieq tħassar il-kont tiegħek, sir af kif tagħmel hekk minn hawn. Tista' tagħżel ukoll li tħassar xi informazzjoni mis-Servizzi tagħna bħal, ngħidu aħna, il-kontenut li ssejvjajt f'Memorji, il-kontenut li qsamt ma' My AI, Spotlight, il-kontenut li bgħatt, u iktar.

• Agħżel min jista' jsib u jiftaħ il-kontenut tiegħek. Ħloqna għadd ta' għodod biex ngħinuk tagħżel ma' min taqsam il-kontenut tiegħek. F'xi każijiet jaf tkun tixtieq taqsam il-kontenut ma' sħabek filwaqt li drabi oħra tkun tixtieq taqsmu ma' kulħadd. Żur dil-paġna biex issir taf iktar.

• Agħżel min jista' jikkuntattjak. Billi Snapchat maħsuba għall-ħbieb tal-qalba u għal tal-familja, nagħtuk l-għażla li tagħżel min jista' jikkuntattjak. Jekk tirċievi messaġġi mhux mixtieqa, dejjem tista' timblokka u tirrapporta lil dik il-persuna. Żur dil-paġna biex issir taf iktar.

• Ibdel il-permessi tiegħek. Fil-biċċa l-kbira tad-drabi, tista' tibdel il-permessi tiegħek fi kwalunkwe ħin. Ngħidu aħna, bħala regola standard kulħadd jista' jsibek bin-numru tal-mowbajl u/jew bl-indirizz tal-email li rreġistrajt bih. Dejjem tista' tibdel is-settings tal-kont tiegħek jekk ma tkunx tixtieq tkompli tħalli lil ħaddieħor isibek b'dawn id-dettalji. Jekk tajt aċċess għall-mowbajl tiegħek jew għall-kuntatti li għandek fuq xi pjattaforma oħra biex tkunlek eħfef li żżid lil sħabek, tista' tibdel dil-għażla meta trid mill-għażliet tal-app tiegħek. Żomm f'moħħok li jekk tagħmel hekk, xi faċilitajiet u Servizzi bħal li ssib lil sħabek mil-lista tal-kuntatti mhux se jibqgħu jaħdmu.

• Agħżel li ma tirċevix messaġġi kummerċjali. Għandek l-għażla li ma tirċevix jew li ttemm l-abbonament mill-emails u l-messaġġi promozzjonali mibgħuta b'SMS jew fuq xi pjattaforma tal-messaġġi oħra. Kemm timxi mal-istruzzjonijiet fil-messaġġ bħal ħolqa biex ittemm l-abbonament jew xi faċilità bħal din biex tagħmel hekk.

• Niżżel id-dejta tiegħek. Tista' tressaq talba mill-għodda Niżżel id-Dejta Tiegħi biex tniżżel kopja tal-informazzjoni li Snapchat għandha dwarek.

• Ma taqbilx mal-ipproċessar. Skont fejn tgħix u x-xorta ta' dejta li nkunu qed nipproċessaw, jaf ikollok il-jedd li ma taqbilx li nipproċessaw dik l-informazzjoni. Din il-ħaġa hija ftit teknika u għalhekk tista' żżur dil-paġna għal iktar dettalji.

• Tqiegħed l-għażliet għar-riklami. Aħna nippruvaw nuruk riklami li nemmnu li jgħoddu għalik. Jekk tixtieq riklami inqas personalizzati, tista' tibdel l-għażliet tar-riklami tiegħek mill-app ta' Snapchat. Sir af iktar minn hawn.

• Ittrekkjar. Jekk tuża iPhone bis-sistema iOS 14.5 jew iġded, hemm xi rekwiżiti li jgħoddu għalik u li semmejniehom hawn.

Dit-taqsima tagħtik id-dettalji dwar liema informazzjoni niġbru: x'taqsam magħna, x'niġbru meta tuża Snapchat u l-informazzjoni li niksbu minn kumpaniji oħra jew mill-apps li tkun irbatt mal-kont ta' Snapchat tiegħek. Kultant nafu niġbru wkoll, bil-permess tiegħek, xi informazzjoni oħra.

Meta tuża s-Servizzi tagħna bħal, ngħidu aħna, Snapchat, aħna niġbru l-informazzjoni li tagħtina, noħolqu informazzjoni meta tuża s-Servizzi tagħna u f'xi każijiet niksbu d-dejta mingħand l-oħrajn. Ejja nidħlu fi ftit iktar fid-dettall.

Ħafna mis-Servizzi tagħna jeħtiġuk toħloq kont. Biex tagħmel hekk nitolbuk tagħtina d-dettalji tal-kont (informazzjoni dwarek bħal ismek, l-isem tal-utent, l-indirizz tal-email,data tat-twelid u n-numru tal-mowbajl). Meta toħloq il-profil tiegħek, tagħtina wkoll id-dettalji tal-profil (bħall-Bitmoji u r-ritratt tal-profil tiegħek). Jekk tuża s-servizzi kummerċjali tagħna biex tixtri xi ħaġa bħal, ngħidu aħna, xi żarbun ġdid, nafu nitolbuk id-dettalji tal-pagament u informazzjoni oħra (bħall-indirizz tiegħek biex inkunu nistgħu nibagħtulek dak li xrajt, l-informazzjoni tal-pagament biex inkunu nistgħu nipproċessaw il-pagament u l-istorja tat-tranżazzjonijiet).

Bla dubju, se tkun qed tagħtina l-informazzjoni wkoll meta tibgħat jew tissejvja xi ħaġa fis-Servizzi tagħna fosthom il-kontenut u l-informazzjoni dwar dak il-kontenut u l-kontenut li taqsam u toħloq bil-Faċilitajiet tal-IA tagħna (kontenut jew “Inputs” fosthom it-test, l-istampi, il-vidjows, l-awdjo, il-post eżatt fejn tinsab u l-interazzjoni li użajt biex toħloq il-kontenut u t-tweġibiet jew “Riżultati”). Aħna nqisu xi wħud minn dil-informazzjoni bħala kontenut u messaġġi privati (bħall-iSnaps, it-Taħditiet ma' sħabek, is-sejħiet bil-leħen u bil-vidjow u l-kontenut issejvjat f'Għalija Biss) jew il-kontenut li taqsam ma' xi pubbliku partikolari bħall-istejjer privati u l-istejjer għal sħabek (L-Istorja Tiegħi bl-għażliet Ħbieb jew Stejjer Privati). Min-naħa l-oħra xi wħud mill-informazzjoni li tibgħat jew tissejvja fis-Servizzi tagħna taf titqies bħala kontenut pubbliku li kulħadd se jkun jista' jiftaħ (bħall-kontenut tal-Istejjer Pubbliċi fosthom il-kontenut L-Istorja Tiegħi bl-għażliet Kulħadd, Stejjer Maqsuma jew Stejjer tal-Komunità, Spotlight jew il-Mappa ta' Snap u l-informazzjoni tal-Profil Pubbliku). Żomm f'moħħok li l-iSnapchatters li jiftħu l-iSnaps, it-Taħditiet u l-kontenut l-ieħor kollu tiegħek dejjem jistgħu jieħdu ritratt tal-iskrin ta' dak il-kontenut, jerfgħuh jew jikkuppjawh barra l-app ta' Snapchat. Tibgħatx messaġġi jew kontenut li ma tridx li ħaddieħor jerfa' jew jaqsam ma' ħaddieħor.

Fl-aħħar nett, meta tikkuntattja lit-Tim tal-Għajnuna (il-kontenut u l-messaġġi li taqsam mat-Tim tal-Għajnuna) jew lit-Tim tas-Sigurtà tagħna jew meta tikkomunika magħna b'xi mod ieħor, anki bħala parti minn stħarriġ (bħal, ngħidu aħna, meta twieġeb għal stħarriġ jew xi mistoqsijiet oħra li nafu nibagħtulek), aħna se niġbru kull informazzjoni li tibgħat jew li neħtieġu biex insewwulek il-problema.

Meta tuża s-Servizzi tagħna, aħna niġbru l-informazzjoni dwar liema minn dawk is-Servizzi tkun użajt u kif tkun użajthom. Dil-ħaġa tgħinna nifhmu aħjar kif il-komunità tagħna tuża s-Servizzi tagħna biex inkunu nistgħu ntejbuhom.

Fosthom hemm l-informazzjoni dwar l-użu tas-servizzi (informazzjoni dwar kif tuża s-Servizzi tagħna — bħal, ngħidu aħna, liema Lentijiet tiftaħ u tuża, l-abbonamenti bil-ħlas tiegħek, l-Istejjer li tiftaħ u kemm tikkomunika ta' sikwit ma' Snapchatters oħra) u l-informazzjoni dwar il-kontenut (informazzjoni dwar il-kontenut li toħloq u tagħti, kif tuża l-kamera u l-għodod kreattivi, kif tuża My AI u l-metadejta — bħal, ngħidu aħna, l-informazzjoni dwar il-kontenut innifsu bħad-data u l-ħin li ġie ppubblikat u min fetħu). L-informazzjoni dwar il-kontenut tiġbor fiha l-informazzjoni msejsa fuq il-kontenut tal-istampa, tal-filmat jew tal-ħoss — jekk tippubblika Spotlight ta' logħba basketball, nistgħu nużaw dik l-informazzjoni biex nuruk iktar kontenut dwar il-basketball fuq Spotlight.

Niġbru wkoll l-informazzjoni dwar it-tagħmir(bħal, ngħidu aħna, il-hardware jew is-software, is-sistema tat-tagħmir, il-memorja tat-tagħmir, l-identità tiegħek għar-riklami, l-apps installati, ix-xorta ta' brawżer, l-informazzjoni mis-sensuri tat-tagħmir li jkejlu ċ-ċaqliq tat-tagħmir jew il-kumpassi u l-mikrofoni, fosthom anki jekk għandekx xi headphones mqabbdin u l-informazzjoni dwar il-konnessjonijiet tal-internet bla wiresu tal-mowbajl tiegħek), l-informazzjoni dwar il-post fejn tinsab(indirizz IP), skont is-settings tiegħek, l-informazzjoni miġbura mill-cookies u teknoloġiji bħalhom (cookies,pixels (stampi li ma jużawx ħafna dejta li jagħrfu l-għemil tal-utenti bħal, ngħidu aħna, kemm utent iżur sit ta' sikwit), il-ħażna tal-internet, identitajiet għar-riklami) u l-informazzjoni tar-reġistri(bħal, ngħidu aħna, dettalji ta' kif użajt is-Servizzi tagħna, il-ħinijiet li użajthom, il-paġni li ftaħt, l-indirizz IP u identifikaturi uniċi bħal cookies).

Jekk diġà tlabniek u tajtna permess niġbru l-informazzjoni mit-tagħmir tiegħek, l-informazzjoni tat-tagħmir jaf ikun fiha wkoll informazzjoni dwar il-lista tal-kuntatti tiegħek (min huma l-kuntatti u informazzjoni oħra marbuta magħhom), stampi u informazzjoni oħra mill-kamera, mir-ritratti u mill-mikrofonu tat-tagħmir tiegħek (bħal, ngħidu aħna, is-setgħa li nieħdu r-ritratti, niġbru l-filmati, nużaw ir-ritratti u l-filmati maħżuna u nużaw il-mikrofonu tat-tagħmir biex nirrekordjaw l-awdjo int u tirrekordja filmat) u l-informazzjoni dwar il-post fejn tinsab (informazzjoni preċiża dwar il-post fejn tinsab miksuba minn metodi bħas-sinjal tal-GPS).

L-aħħar kategorija ta' dejta li niġbru hija l-informazzjoni dwarek li nafu nirċievu mingħand l-oħrajn bħal, ngħidu aħna, utenti oħra, l-imsieħba tagħna u persuni naturali jew legali barra l-kumpanija tagħna. Din il-kategorija tiġbor fiha dejta tas-servizzi ta' kumpaniji oħra li jaqbdu mal-pjattaforma tagħna (l-informazzjoni li niksbu meta torbot il-kont ta' Snapchat tiegħek ma' servizz ieħor), id-dejta mingħand ir-reklamaturi (l-informazzjoni mingħajr ir-reklamaturi, l-iżviluppaturi tal-apps, il-pubblikaturi u persuni oħra li jgħinuna nsibu udejnza għar-reklami u nkejlu s-suċċess tar-reklami), l-informazzjoni tal-kuntatt mingħand Snapchatters jew persuni oħra (jekk Snapchatter ieħor itella' l-lista tal-kuntatti tiegħu u jkun fiha d-dettalji tiegħek, nistgħu ngħaqqdu dik l-informazzjoni ma' informazzjoni oħra li għandna dwarek biex nifhmu ma' min tkun tixtieq tikkomunika. Jew jekk tagħtina d-dettalji tal-kuntatt tiegħek, nistgħu nifhmu kif nistgħu nikkuntattjawk b'modi oħra bħal SMS, email jew servizzi tal-messaġġi oħra), u dejta marbuta ma' suspetti ta' ksur tat-Termini tagħna (nistgħu niksbu l-informazzjoni dwar suspett ta' ksur tat-Termini tas-Servizz u l-Linji Gwida tal-Komunità tagħna mingħand persuni oħra fosthom sidien ta' siti, operaturi ta' pjattaformi ta' midja soċjali, l-infurzar tal-liġi u oħrajn).

Barra minn hekk jaf ikun hemm sitwazzjonijiet fejn tuża s-Servizzi tagħna u aħna nitolbuk permess biex niġbru iktar informazzjoni. Dan jista' jseħħ meta, ngħidu aħna, inkunu nixtiequ niftħu l-gallerija tar-ritratti jew il-lista tal-kuntatti tat-tagħmir tiegħek jew ta' xi app oħra.

Dit-taqsima tispjega kif nużaw l-informazzjoni li niġbru. Fost għanijiet oħra, nużaw l-informazzjoni li niġbru biex nagħtuk prodotti u Servizzi personalizzati li naħdmu qatigħ biex nibnu u ntejbu. Hawn taħt se nfissrulek fid-dettall kull għan li għalih nużaw l-informazzjoni. Jekk tixtieq lista tad-dejta li niġbru bl-għanijiet li niġbruha għalihom, tista' ssib tabella hawn.

Aħna nużaw l-informazzjoni li niġbru biex inħaddmu, inwasslu u nżommu s-Servizzi tagħna. Ngħidu aħna, billi ngħaddu l-iSnap li tixtieq tibgħat lil xi ħadd minn sħabek jew, jekk taqsam il-post fejn tinsab fuq Mappa tas-Snaps, biex nagħtuk suġġerimenti bħal, ngħidu aħna, postijiet li jafu jogħġbuk fil-viċinat tiegħek, kontenut li oħrajn ippubblikaw fuq il-Mappa jew nagħtuk l-informazzjoni dwar sħabek jekk ikunu qed jaqsmu miegħek il-post fejn jinsabu. Aħna nużaw ukoll xi informazzjoni tiegħek biex inżommu l-prodotti u s-servizzi tagħna aġġornati, bħal ngħidu aħna biex niżguraw li s-Servizzi tagħna jaħdmu fuq l-iġded sistemi u tagħmir.

Aħna nagħtu Servizzi personalizzati lill-iSnapchatters. Wieħed mill-modi kif nagħmlu hekk huwa billi nuruk kontenut siewi għalik, jew li naħsbu li jaf jogħġbok, skont l-informazzjoni li taqsam magħna. Biex nagħmlu hekk, nużaw l-informazzjoni li għandna dwarek f'għadd ta' oqsma tas-Servizzi ħalli b'hekk nagħtuk esperjenza b'iktar kuntest int u tuża l-pjattaforma tagħna. Ngħidu aħna, nimmarkaw il-kontenut b'tikketti awtomatiċi skont il-kontenut, il-post fejn tinsab jew il-ħin tal-jum. Allura, jekk nagħrfu li hemm kelb fir-ritratt, huwa possibli li tkun tista' tfittex dak ir-ritratt f'Memorji billi tikteb il-kelma “kelb”, li jintwera fuq il-mappa fil-post fejn ħloqt il-memorja, u nqisu li jogħġbuk il-klieb u għalhekk inkunu nistgħu nuruk filmati divertenti dwar il-klieb jew riklami bl-ikel tal-klieb f'oqsma oħra tas-Servizzi tagħna bħal, ngħidu aħna, Spotlight.

Il-personalizzazzjoni tista' tgħinna wkoll meta niġu biex nissuġġerulek ħbieb ġodda li tkun tista' tibagħtilhom Snap skont in-nies li magħhom tuża Snap l-iktar. Nistgħu nuruk postijiet suġġeriti fuq il-Mappa ta' Snap, noħolqu stikers u anki noħolqu Snaps u kontenut ieħor bl-IA biex taqsamhom mal-ħbieb, nissoponu x'jista' jogħġbok skont il-kontenut li ttella' u l-għemil li twettaq fuq l-internet jew nippersonalizzaw il-kontenut li nuruk, fosthom ir-riklami. Jekk, ngħidu aħna, tiftaħ kontenut marbut mal-baristas fuq Spotlight, titħaddet dwar liema hi l-magna favorita tal-espresso tiegħek mal-My AI, jew terfa' ħafna Snaps marbuta mal-kafè f'Memorji, meta żżur xi belt ġdida nistgħu nuruk fejn huma l-ħwienet tal-kafè fuq il-Mappa ta' Snap jew nuruk kontenut dwar il-kafè li naħsbu li jogħġbok jew li jkun jgħodd għalik. Jew, jekk tiftaħ ħafna kontenut ta' postijiet tal-mużika, nistgħu nużaw dik l-informazzjoni biex nuruk riklami dwar avvenimenti li jkunu se jseħħu fil-belt fejn tkun. Il-personalizzazzjoni tfisser ukoll li naddattaw l-esperjenza tiegħek skont dak li sħabek ikunu qed jagħmlu fuq Spotlight u skont ma' min tqatta' l-iktar ħin fuq Snapchat, fosthom il-kontenut li joħolqu, jimmarkaw li jogħġobhom, jew li jieħdu gost jaraw, jew nissuġġerulek Postijiet li huma mfittxija minn sħabek.

L-għan tagħna huwa li dejjem nibqgħu nwasslulek kontenut li hu iktar siewi u interessanti.

Jekk, ngħidu aħna, tiftaħ ħafna kontenut dwar l-isport imma taqbeż il-kontenut b'pariri dwar ix-xagħar u l-makeup, aħna u nissuġġerulek il-kontenut, l-algoritmi tagħna se jagħtu prijorità lill-kontent dwar l-isport, u mhux kontenut b'pariri dwar il-makeup. Tista' żżur dil-paġna biex issir taf iktar x'valur nagħtu lill-għażliet tal-iSnapchatter u kif insarbtu u ngħarblu l-kontenut.

Aħna nemmnu li hija kruċjali wkoll li nibbilanċjaw il-benefiċċji tal-personalizzazzjoni mal-livell tal-privatezza li l-iSnapchatters jistennew mingħandna. Ngħidu aħna, nistgħu nimmarkaw l-iSnaps li terfa' f'Memorji awtomatikament skont il-kontenut li fihom (bħal, ngħidu aħna, Snap li fiha kien hemm kelb), u mbagħad nużaw dik it-tikketta biex nippersonalizzaw l-esperjenza tiegħek, nagħtuk suġġerimenti jew nuruk ir-riklami (bħal, ngħidu aħna, nuruk Snaps li fihom il-klieb fuq Spotlight). Ma nużawx il-kontenut u l-messaġġi privati li tibgħat lil sħabek biex nippersonalizzaw l-esperjenza tiegħek, nagħtuk suġġerimenti jew biex nuruk ir-riklami.

Mod ieħor ta' kif noffru Servizz personalizzat huwa bir-riklami li nuru. Aħna nużaw dak li jogħġbok u l-għażliet tiegħek mill-informazzjoni li nkunu ġbarna biex nippersonalizzaw, insibu pubbliku u nkejlu s-suċċess tar-riklami. Nemmnu li r-riklami jaħdmu l-aħjar meta jkunu siewja. Għalhekk nippruvaw nagħżlu riklami addattati għalik u nuruhomlok fil-ħin addattat. Jekk, ngħidu aħna, ftaħt riklam dwar il-logħob diġitali, aħna nissoponu li jogħġbuk il-logħob diġitali, u nuruk riklami ta' dik ix-xorta, għalkemm mhux se jkunu l-uniċi reklami li se nuruk. L-istess bħalma nagħmlu bil-kontenut, nippruvaw niżguraw li nuruk firxa wiesgħa ta' riklami. Nużaw l-informazzjoni tiegħek biex nevitaw li nuruk ukoll riklami li probabbli ma jinteressawkx. Ngħidu aħna, jekk xi sit tal-biljetti jgħarrafna li diġà xtrajt il-biljetti għal film partikolari — nistgħu nieqfu nkomplu nuruk ir-riklami għal dak il-film. Tista' żżur dil-paġna biex issir taf iktar dwar ix-xorta ta' riklami u l-għażliet tiegħek b'rabta mar-riklami li nuruk.

Tista' żżur dil-paġna biex issir taf iktar kif niġbru, nużaw u naqsmu l-informazzjoni tiegħek b'rabta mar-riklami.

Nota dwar l-informazzjoni li niġbru bil-cookies u teknoloġiji oħra: aħna nistgħu nużaw dawn it-teknoloġiji biex niġbru l-informazzjoni meta tuża xi Servizzi li nagħtu flimkien ma' xi msieħba minn tagħna. Nistgħu, ngħidu aħna, nużaw l-informazzjoni li nkunu ġbarna minn sit ta' reklamatur biex nuruk iktar riklami siewja. Bħala regola standard, ħafna brawżers tal-internet huma pprogrammati li jaċċettaw cookies awtomatikament. Jekk tixtieq ħafna drabi tista' tneħħi jew tiċħad il-cookies mill-għażliet tal-brawżer jew mill-għażliet tat-tagħmir tiegħek. Biss importanti żżomm f'moħħok li jekk tneħħi jew tiċħad il-cookies, il-ħidma tas-Servizzi tagħna li tuża jew tħaddem tista' tintlaqat. Jekk jogħġbok aqra l-Politika tal-Cookies tagħna biex issir taf iktar kif aħna u l-imsieħba tagħna nużaw l-għażliet tiegħek u l-cookies fuq is-Servizzi tagħna.

It-timijiet tagħna l-ħin kollu joħorġu b'ideat għal faċilitajiet u modi ġodda biex intejbu s-Servizzi tagħna. Biex nagħmlu hekk, noħolqu u ntejbu l-algoritmi u l-mudelli għat-tagħlim tal-magni (ġabra ta' algoritmi li jistgħu jqallbu għadd kbir ta' dejta u jsibu jew ibassru x-xejriet) li jgħinu lis-Servizzi u l-faċilitajiet tagħna jaħdmu, fosthom il-faċilitajiet tal-IA ħallieqa (l-intelliġenza artifiċjali li tista' toħloq il-kitba, l-istampi jew il-forom l-oħra tal-midja grazzi għall-mudelli tal-ħolqien. Il-mudelli tal-IA Ħallieqa jagħrfu x-xejriet u l-binja tad-dejta għat-taħriġ li nagħtuhom u mbagħad joħolqu dejta ġdida bl-istess karatteristiċi). Aħna nużaw l-algoritmi u l-mudelli għat-tagħlim tal-magni biex nippersonalizzaw il-pjattaforma, għar-riklami, għas-sigurtà, għal tmexxija ġusta u inklussiva, għar-realtà miżjuda u biex nevitaw l-abbuż jew ksur ieħor tar-Regoli tas-Servizz. L-algoritmi u l-mudelli għat-tagħlim tal-magni tagħna jqisu, ngħidu aħna, it-taħditiet li l-iSnapchatters ikollhom ma' My AI biex itejbu t-tweġibiet ta' My AI.

Għalkemm l-informazzjoni tiegħek tista' tgħinna nagħżlu liema xorta ta' titjib għandna nwettqu, il-privatezza tibqa' dejjem importanti ħafna għalina — u ma rridux nużaw iktar informazzjoni personali tiegħek milli neħtieġu biex noħolqu l-faċilitajiet u l-mudelli tagħna.

Biex nifhmu x'għandna noħolqu jew kif intejbu s-Servizzi tagħna, neħtieġu nifhmu x-xejriet u t-talba għall-faċilitajiet tagħna. Ngħidu aħna, inżommu għajnejna fuq il-metadejta u x-xejriet tat-Taħditiet tal-Gruppi u nużaw din l-informazzjoni biex nifhmu jekk għandniex nibdlu xi ħaġa fil-faċilità bħal, ngħidu aħna, l-ikbar daqs ta' Grupp. Meta nifhmu d-dejta li niġbru mill-iSnapchatters inkunu nistgħu nagħrfu x-xejriet fil-mod kif in-nies jużaw is-Servizzi. Dil-ħaġa tgħinna ntejbu Snapchat fuq skala ikbar. Aħna nistudjaw id-dejta biex nagħrfu, inżommu għajnejna fuq u nifhmu x-xejriet u kif qed jintużaw is-servizzi tagħna. B'dil-informazzjoni, fost l-oħrajn, se noħolqu informazzjoni dwar l-utenti tagħna li tgħinna nifhmu t-talba għas-servizzi tagħna.

Aħna nwettqu riċerka biex nifhmu aħjar x'qed ifittex il-konsumatur ġenerali, ix-xejriet u kif is-Servizz tagħna qed jintuża minnek u minn membri oħra tal-komunità tagħna. Dil-informazzjoni, flimkien mal-fehim tad-dejta (kif imsemmi hawn fuq), tgħinna nifhmu lill-komunità tagħna aħjar u kif is-Servizzi tagħna jagħmlu parti minn ħajjet il-membri tal-komunità tagħna. Inwettqu wkoll ħidma ta' riċerka u żvilupp biex noħolqu teknoloġiji u tekniki ġodda (ngħidu aħna, mudelli għat-tagħlim tal-magni ġodda jew hardware, bħal Spectacles). Kultant ir-riżultati tar-riċerka tagħna jintużaw f'faċilitajiet ta' Snapchat u kultant nippubblikaw artikli dwar l-imġiba u x-xejriet tal-konsumatur ġenerali (li fiha jkun hemm biss ġabra ġenerali ta' dejta dwar l-utenti tagħna, mingħajr ebda informazzjoni privata dwarek).

Aħna nużaw l-informazzjoni tiegħek biex intejbu s-sigurtà tas-Servizzi tagħna, nivverifikaw l-identità tal-iSnapchatter u nħarsu mill-qerq jew għemil ieħor kontra l-liġi jew mingħajr permess. Ngħidu aħna, nagħtu awtentikazzjoni b'żewġ fatturi biex ngħinu nħarsu l-kont tiegħek u nistgħu nibagħtulek email jew messaġġ jekk insibu li hemm xi għemil mhux tas-soltu. Nistgħu wkoll niċċekkjaw l-URLs li tibgħat fuq Snapchat biex nifhmu jekk dak is-sit jistax ikun ta' ħsara u f'dak il-każ, inkunu nistgħu nwissuk dwaru.

Kultant se nikkuntattjawk biex ngħarrfuk dwar xi faċilità, kemm ġdida kif ukoll li diġà teżisti. Dan ifisser li se nibagħtu messaġġi lill-iSnapchatters fuq Snapchat, bl-email, b'SMS jew fuq pjattaformi tal-messaġġi oħra, fejn nistgħu. Nistgħu, ngħidu aħna, nużaw l-app ta' Snapchat, l-email, l-SMS jew pjattaformi tal-messaġġi oħra biex naqsmu l-informazzjoni dwar is-Servizzi tagħna u l-offerti tagħna li naħsbu li jafu jinteressawk.

Drabi oħra nafu nkunu neħtieġu li nikkuntattjawk biex nagħtuk xi informazzjoni, twissijiet jew biex nibagħtu l-messaġġi li l-utenti tagħna jitolbuna nwasslulek. Fosthom hemm li nibagħtu l-messaġġi fuq Snapchat, bl-email, b'SMS jew fuq pjattaformi tal-messaġġi oħra, fejn nistgħu, biex nagħtu l-aħħar aħbarijiet dwar il-kont, twissijiet tas-sigurtà, tfakkiriet ta' Taħditiet jew biex iżżid xi ħbieb. Nistgħu wkoll nibagħtu messaġġi mitluba mill-utenti tagħna fejn jistiedenu bħala ħbieb lil xi nies li ma jużawx Snapchat jew jaqsmu xi kontenut magħhom.

Meta titlobna l-għajnuna, nixtiequ nagħtuk l-għajnuna malajr kemm jista' jkun. Biex inkunu nistgħu nagħtu lilek, lill-komunità ta' Snapchatters u lill-imsieħba kummerċjali tagħna l-għajnuna meħtieġa biex isewwu l-problemi bis-Servizzi tagħna, ħafna drabi nkunu neħtieġu nużaw l-informazzjoni li nkunu diġà ġbarna biex inwieġbu.

Aħna nużaw id-dejta li niġbru biex inwettqu t-Termini tagħna u l-liġi. Fosthom li ninfurzaw, ninvestigaw u nirrappurtaw imġiba li tmur kontra t-Termini u l-politiki tagħna jew il-liġi, inwieġbu għat-talbiet mill-infurzar tal-liġi u nwettqu d-dmirijiet legali tagħna. Ngħidu aħna, meta jittella' xi kontenut li jikser il-liġi fuq is-Servizzi tagħna, nafu nkunu meħtieġa nwettqu t-Termini u l-politiki l-oħra tagħna. F'ċerti sitwazzjonijiet, nafu nużaw jew naqsmu l-informazzjoni tiegħek biex inwettqu t-talbiet mitluba mill-infurzar tal-liġi, biex nirrappurtaw każijiet tas-sigurtà lill-infurzar tal-liġi, lill-imsieħba kummerċjali jew oħrajn jew biex nimxu mad-dmirijiet legali tagħna. Biex issir taf iktar, aqra r-Rapport tat-Trasparenza tagħna.

Barra minn hekk, jaf ikun hemm drabi oħra meta tuża s-Servizzi tagħna u nitolbuk permess biex nużaw l-informazzjoni tiegħek b'mod ġdid, differenti jew b'xi mod ieħor.

Dit-taqsima tispjega ma' min naqsmu l-informazzjoni, x'informazzjoni nafu naqsmu u r-raġunijiet għaliex naqsmu dik l-informazzjoni fosthom meta nkunu meħtieġa nibagħtuha barra l-pajjiż fejn tkun inġabret.

• Snapchat. Biex nagħtu s-Servizzi tagħna lilek u lill-komunità, nistgħu naqsmu l-informazzjoni tiegħek ma' sħabek ta' Snapchat jew Snapchatters oħra bħal, ngħidu aħna, il-kontenut li tippubblika fuq Stejjer u l-istatus tiegħek bħala abbonament bil-ħlas jista' jinstab minn Sħabek jekk tħallihom isibuh. Żur it-taqsima Kontroll fuq l-Informazzjoni Tiegħek u iftaħ is-Settings biex issib l-għażliet li għandek fuq min jista' jsib xiex u meta.

• Il-Membri taċ-Ċentru tal-Familja. Meta tixgħel iċ-Ċentru tal-Familja, aħna naqsmu l-informazzjoni dwar il-kont tal-adoloxxenti marbut miegħu mal-ġenitur jew mal-gwardjan legali biex nagħtuh ħjiel ta' kif l-adoloxxenti qed juża l-kont tiegħu, ngħidu aħna, min huma Sħabek fuq Snapchat jew ma' min fost sħabek qed taqsam il-post fejn tinsab miegħu. Ma naqsmux il-kontenut tal-messaġġi. Sir af iktar.

• Il-Pubbliku. Il-biċċa l-kbira tal-faċilitajiet ta' Snapchat huma privati u għal Sħabek biss, imma għandna wkoll faċilitajiet pubbliċi fejn tista' tagħżel li l-aqwa Snaps tiegħek jinqasmu mal-bqija tad-dinja bħal ngħidu aħna Spotlight, il-Mappa ta' Snap jew il-Profil Pubbliku tiegħek. Meta tagħmel hekk, dawk l-iSnaps jafu jkunu jistgħu jinstabu minn barra l-pjattaforma ta' Snapchat bħal, ngħidu aħna fuq l-internet ġenerali. i informazzjoni bħall-isem tal-utent u l-Bitmoji jintwerew pubblikament. Sir af iktar.

• Apps ta' Kumpaniji Oħra. Kultant noffru faċilitajiet li jħalluk taqbad ma' apps ta' kumpaniji oħra. Jekk tagħżel li torbot il-kont ta' Snapchat tiegħek ma' app ta' kumpanija oħra, aħna se naqsmu kull informazzjoni li titlobna naqsmu ma' dik l-app.

• Operaturi tas-Servizzi. Naqsmu l-informazzjoni tiegħek mal-operaturi tas-servizzi tagħna li jipproċessaw dik l-informazzjoni f'isimna. Aħna neħtieġu dawn l-Operaturi tas-Servizzi biex inkunu nistgħu niksbu l-pagamenti jew biex inkejlu u ntejbu l-kisbiet tar-riklami jew biex inħarsu s-servizzi. Ma naqsmux il-messaġġi privati magħhom. Hawntista' ssib lista ta' kategoriji tal-operaturi tas-servizzi.

• Imsieħba Kummerċjali u Integrati. Naqsmu l-informazzjoni tiegħek mal-imsieħba kummerċjali u integrati biex inkunu nistgħu nagħtu s-Servizzi tagħna. Tista', ngħidu aħna, tuża OpenTable direttament minn Snapchat biex tibbukkja mejda. Ma naqsmux il-messaġġi privati magħhom. Hawn tista' ssib il-lista ta' dawn l-imsieħba.

• Imsieħba għall-Ħidma Kontra l-Qerq. Naqsmu l-informazzjoni tiegħek bħal, ngħidu aħna, l-informazzjoni dwar it-tagħmir u dwar kif tuża s-servizzi tagħna, mal-imsieħba tal-industrija li jaħdmu biex iħarsuna mill-qerq.

• Imsieħba fil-Qasam Legali u tas-Sigurtà. Naqsmu l-informazzjoni tiegħek skont il-ħtieġa għal dawn l-għanijiet marbuta mal-liġi u mas-sigurtà:

  • Biex nimxu mal-proċessi legali, mat-talbiet tal-gvernijiet jew mal-liġijiet, regoli jew regolamenti tajbin li obbligati nimxu magħhom.

  • Biex ninvestigaw, insewwu jew inwettqu t-Termini tas-Servizz u l-Linji Gwida tal-Komunità f'każ ta' ksur.

  • Biex inħarsu l-jeddijiet, il-propjetà jew is-sigurtà tagħna, tal-utenti tagħna jew tal-oħrajn.

  • Biex insibu u nwaqqfu kull tħassib ta' qerq jew problema bis-sigurtà.

• Imsieħba. Snap Inc. għandha għadd ta' kumpaniji li jaqgħu taħtha. Nistgħu naqsmu l-informazzjoni tiegħek ma' dawn il-kumpaniji li jaqgħu taħtna skont il-ħtieġa biex inħaddmu s-Servizzi tagħna.

• Għaqda bejn il-Kumpaniji jew Xiri ta' Kumpaniji. Jekk inkunu se nbigħu jew inkunu qed ninnegozjaw biex inbigħu n-negozju tagħna lil xerrej jew xi ħadd li jaf ikun xerrej, nistgħu ngħaddu l-informazzjoni tiegħek lill-kumpanija werrieta tagħna jew lil imsieħeb bħala parti minn dik it-tranżazzjoni.

Is-Servizzi tagħna jaf ikun fihom kontenut u integrazzjonijiet mogħtija mill-imsieħba integrati tagħna. Fosthom hemm integrazzjonijiet f'Lentijiet, fl-għodod tal-bidliet tal-Kamera, biex jagħtuk riżultati ta' Skenn u integrazzjonijiet ġejjin minn żviluppaturi minn parti terza. B'dawn l-integrazzjonijiet jaf tkun qed tagħti l-informazzjoni lil sieħeb integrat kif ukoll lil Snap. Aħna m'għandna l-ebda responsabbiltà fuq kif dawn l-imsieħba jiġbru jew jużaw l-informazzjoni tiegħek. Bħal dejjem inħeġġuk taqra l-politiki tal-privatezza ta' kull servizz ieħor barra l-kumpanija tagħna li żżur jew tuża, fosthom dawk ta' kumpaniji oħra li tuża mis-Servizzi tagħna. Hawn tista' ssir taf iktar dwar l-integrazzjonijiet fi Snapchat.

Fuq iOS nużaw il-kamera TrueDepth ta' Apple biex intejbu l-kwalità tal-Lentijiet. Biss żomm f'moħħok li dil-informazzjoni tintuża direttament — la naħżnu dil-informazzjoni fuq is-servers tagħna u lanqas naqsmuha ma' kumpaniji barranin.

Is-Servizzi tagħna jqabbduk ma' sħabek minn madwar id-dinja kollha. Biex ikunu jistgħu jagħmlu hekk, aħna nafu niġbru l-informazzjoni tiegħek minn, ngħadduha lil u naħżnuha u nipproċessawha fl-Istati Uniti tal-Amerka jew f'pajjiżi oħra li ma tgħix fihom. Meta naqsmu l-informazzjoni barra l-pajjiż fejn tgħix, aħna niżguraw li tintbagħat u titħares skont il-liġi tal-post fejn tgħix. Żur it-taqsima Informazzjoni Addattata għar-Reġjun għal iktar dettalji jekk tixtieq issir taf iktar dwar dil-ħaġa.

F'dit-taqsima se nagħtuk l-informazzjoni dwar it-tul ta' żmien li nżommu l-informazzjoni tiegħek, għaliex inżommu l-informazzjoni tiegħek u nsemmu wkoll kif kultant nafu nkunu meħtieġa nżommu l-informazzjoni tiegħek biex nimxu mal-liġijiet, ma' xi ordni tal-qorti jew minħabba obbligi oħra.

Bħala regola ġenerali, aħna nżommu l-informazzjoni sakemm tħallina nagħmlu hekk jew skont kemm inkunu neħtieġu nżommuha biex nagħtuk is-Servizzi tagħna jew kif mitlub bil-liġi. Ngħidu aħna, jekk taħżen xi ħaġa f'Memorji, aħna se nżommuha hemm sakemm tkun teħtieġha, imma meta tuża Taħdida biex tibgħat messaġġi lil xi ħadd minn sħabek, is-sistemi tagħna mfassla biex tħassar il-messaġġi li tibgħat f'Taħdita fi żmien 24 siegħa minn meta jinqara minn sħabek (jew awtomatikament wara li jinftetaħ — skont l-għażliet tiegħek mill-Għażliet). Inżommux id-dejta tiegħek jew le jiddependi mill-faċilità nnifisha, l-Għażliet tiegħek u kif tkun qed tuża s-Servizzi. Dawn huma xi fatturi li nqisu aħna u nagħżlu għal kemm żmien inżommu l-informazzjoni tiegħek:

• Jekk ikun jeħtiġilna naħżnu l-informazzjoni biex inħaddmu jew nagħtu s-Servizzi tagħna. Ngħidu aħna, li naħżnu d-dettalji tal-kont tiegħek — bħal ismek, in-numru tal-mowbajl u l-indirizz tal-email — biex inżommulek il-kont.

• Biex inwettqu dak li tistenna mis-Servizzi tagħna u kif fissirnielek li se nagħmlu f'dil-Politika tal-Privatezza. Ngħidu aħna, inżommu l-lista ta' sħabek sakemm titlobna nħassruha għax sħabek huma importanti ħafna biex tesprimi ruħek. Bl-istess mod inżommu l-lista tal-kuntatti li taqsam sakemm titlobna nneħħuhom mill-għażliet tal-app tagħna (żomm f'moħħok: jekk tibdel il-permessi tat-tagħmir tiegħek ma tkunx qed tneħħi l-kuntatti li diġà qsamt ma' Snapchat). Sir af iktar. Min-naħa l-oħra, sakemm ma tkunx bdilt l-għażliet standard tiegħek jew għażilt li terfa' xi ħaġa (f'dak il-każ nimxu max-xewqat tiegħek), l-iSnaps u t-Taħditiet li bgħatt fuq Snapchat se jitħassru awtomatikament mis-servers tagħna fi żmien 24 siegħa wara li nifhmu li nfetħu minn kull utent li bgħatthomlu jew jiskadu.

• L-informazzjoni nnifisha. Ngħidu aħna, naħżnu l-informazzjoni tal-post fejn tinsab għal tul ta' żmien differenti skont kemm tkun preċiża u skont liema Servizzi tuża. Jekk l-informazzjoni tal-post fejn tinsab tkun marbuta ma' xi Snap — bħal ngħidu aħna l-iSnaps maħżuna f'Memorji jew ippubblikata fuq il-Mappa tas-Snaps jew Spotlight — aħna se nżommu dik l-informazzjoni sakemm tkun għadek qed taħżen l-iSnap. Suġġeriment: Tista' tniżżel id-dejta tiegħek biex issib id-dejta dwar il-post fejn tinsab li għandna dwarek.

• It-tul ta' żmien ta' kemm jeħtiġilna nżommu l-informazzjoni biex nimxu ma' xi obbligi legali.

• Jekk inkunu neħtiġuha għal għanijiet leġittimi oħra, bħal ngħidu aħna li nwaqqfu milli ssir xi ħsara, ninvestigaw jekk kienx hemm ksur tar-Regoli tas-Servizz jew politiki oħra tagħna, ninvestigaw rapporti ta' abbuż jew biex inħarsu lilna nfusna jew lil ħaddieħor.

• Għal iktar dettalji dwar kemm inżommu l-informazzjoni fit-tul għal kull servizz jew prodott, agħti titwila lejn il-paġna tal-Privatezza għas-Servizz jew Prodott u lejn il-paġna tal-għajnuna tagħna.

Anki jekk is-sistemi tagħna huma mfassla biex iħassru xi informazzjoni tiegħek awtomatikament, ma nistgħux nagħtuk żmien preċiż ta' meta se nħassru dik l-informazzjoni.

F'xi każijiet jeħtiġilna nimxu ma' rekwiżiti legali biex naħżnu d-dejta tiegħek u għalhekk ma nkunux nistgħu nħassru l-informazzjoni tiegħek. Dan jista' jiġri jekk, ngħidu aħna, nirċievu ordni tal-qorti li titlobna nżommu kopja tal-kontenut tiegħek. Hemm raġunijiet oħra li minħabba fihom nafu nżommu kopja tad-dejta tiegħek, fosthom jekk nirċievu rapport dwar abbuż jew ksur ta' Regoli jew politiki oħra, jew jekk il-kont jew il-kontenut tiegħek, jew il-kontenut li ħloqt ma' Snapchatters oħra jiġi rrappurtat minn utenti oħra jew mis-sistemi tagħna minħabba xi abbuż jew ksur ta' Regoli jew politiki oħra. Fl-aħħar nett, nistgħu wkoll inżommu kopji maħżuna ta' xi informazzjoni għal tul ta' żmien limitat jew skont m'aħna mitluba bil-liġi.

Aqra s-Sit tal-Għajnuna tagħna għall-iġded informazzjoni dwar għal kemm żmien inżommu kull xorta ta' kontenut.

Skont fejn tgħix, jaf ikollok iktar jeddijiet. Dit-taqsima tagħtik iktar dettalji bl-informazzjoni marbuta ma' dak ir-reġjun partikolari.

Għalkemm nagħmlu l-almu tagħna biex inżommu l-politiki tagħna sempliċi kemm jista' jkun, skont fejn toqgħod, jaf ikollok xi ftit iktar jeddijiet jew jaf ikun hemm xi informazzjoni speċifika li għandek tkun taf. Jekk jogħġbok agħti titwila lejn il-lista t'hawn taħt biex tifhem jekk hemmx xi ħaġa li tgħodd għalik.

• L-Awstralja

• Il-Brażil

• Il-Kanada

• L-Ewropa

• Il-Messiku

• Il-Korea t'Isfel

• It-Turkija

• L-Istati Uniti tal-Amerka

  • Nota: It-Tagħrif tal-Privatezza tal-Istati Uniti tal-Amerka jgħodd biss jekk toqgħod f'ċerti stati tal-Istati Uniti tal-Amerka li għandhom liġijiet statali tal-privatezza.

Xi ġurisdizzjonijiet jeħtieġu li aħna nfissru l-bażi legali għall-ipproċessar tad-dejta għal xi għanijiet partikolari. Tista' ssib dik l-informazzjoni minn hawn.

Is-Servizzi tagħna huma maħsuba għall-individwi li għandhom 13-il sena jew iktar.

Is-Servizzi tagħna mhux maħsuba għat-tfal taħt it-13-il sena u biex toħloq kont u tuża s-Servizzi tagħna jeħtieġlek tikkonferma li għalaqt it-13-il sena. Jekk insiru nafu li għadek m'għalaqtx it-13-il sena (jew l-inqas età meħtieġa biex persuna tuża s-Servizzi mingħajr il-permess tal-ġenituri fl-istat, fil-provinċja jew fil-pajjiż tiegħek, jekk ikbar), aħna mhux se nkomplu nagħtuk is-Servizzi tagħna u se nħassru l-kont u d-dejta tiegħek.

Barra minn hekk, nistgħu nillimitaw ukoll kif niġbru, nużaw u naħżnu xi informazzjoni ta' Snapchatters li għadhom m'għalqux it-18-il sena. F'ċerti każijiet, dan ifisser li mhux se nkunu nistgħu nagħtu ċerti faċilitajiet lil nies taħt it-18-il sena.

Minn żmien għal żmien nistgħu nibdlu l-Politika tal-Privatezza tagħna. Jekk inkunu se nagħmlu xi bidliet li nemmnu li għandek tkun taf dwarhom, se ngħarrfuk bihom minn qabel.

Nistgħu nibdlu l-Politika tal-Privatezza tagħna minn żmien għal żmien. Imma meta nagħmlu hekk, dejjem se ngħarrfuk b'xi mod jew ieħor. Xi drabi, se ngħarrfuk billi nibdlu d-data fin-naħa ta' fuq tal-Politika tal-Privatezza li tista' ssib fuq is-sit u l-app tal-mowbajl tagħna. Drabi oħra nistgħu nagħtuk iktar tagħrif (billi, ngħidu aħna, nżidu stqarrija fuq il-paġna ewlenija tas-sit tagħna jew billi nibagħtulek notifikazzjoni bl-app).

Għandek xi mistoqsijiet dwar l-informazzjoni li t'hawn jew tixtieq tikkuntattja lill-Uffiċjal tal-Ħarsien tad-Dejta (UĦD) tagħna? Tista' tikkuntattjana hawn.