Privacy, Safety, and Policy Hub
Regoli tal-Komunità

Theddid, Vjolenza u Ħsara

Sensiela ta' Taħriġ dwar ir-Regoli tal-Komunità

Aġġornat: Jannar 2023

Ħarsa ġenerali

Is-sigurtà u l-benesseri tal-komunità tagħna huma importanti ħafna għalina ta' Snapchat u għalhekk nieħdu kull theddida, vjolenza u ħsara b'serjetà kbira. Ma naċċettawx kontenut li jħeġġeġ, jhedded jew juri l-vjolenza jew l-imġiba perikoluża jew il-kontenut li jfaħħar u jħeġġeġ lil dak li jkun jagħmel il-ħsara lilu nnifsu. Nafu nirrappurtaw it-theddidiet serji għall-ħajja tal-bniedem lill-infurzar tal-liġi.

Għalkemm il-politiki u l-għarbiel kollu li nwettqu jgħinna niżguraw li l-pjattaforma tagħna tkun sigura għall-utenti kollha, ninvestu minn rajna wkoll f'faċilitajiet u riżorsi biex ngħinu fil-benesseri tal-komunità tagħna. Aħna nħeġġu lill-iSnapchatters jirrappurtaw il-kontenut li jagħti ħjiel ta' nies qed jagħmlu ħsara lilhom infushom jew nies li jidhru li għandhom xi problema emozzjonali biex it-timijiet tagħna jkunu jistgħu jibagħtu r-riżorsi li jistgħu jkunu ta' siwi u, kultant, jgħarrfu lill-ħaddiema tal-emerġenza tas-saħħa b'dawn il-każijiet.

  • Ma tistax tħeġġeġ jew twettaq għemil vjolenti jew perikoluż. Qatt m'għandek tipprova tbeżża' jew thedded lil xi persuna, lil grupp ta' nies jew lill-propjetà tagħhom li se tagħmlilhom xi ħsara.

  • Ma tistax ittella' Snaps ta' vjolenza esaġerata jew brutali, fosthom abbuż fuq l-annimali.

  • Ma naċċettawx Snaps li jfaħħru lil dawk li qed jagħmlu ħsara lilhom infushom, fosthom Snaps li jħeġġu lill-utenti jagħmlu l-ħsara lilhom infushom, li jneħħu ħajjithom b'idejhom jew li jfaħħru d-disturb fid-drawwiet tal-ikel

X'għandek tistenna

Ir-Regoli tal-Komunità tagħna marbuta mat-Theddid, mal-Vjolenza u mal-Ħsara juru l-impenn tagħna li nneħħu l-kontenut li jhedded is-sigurtà tal-komunità tagħna filwaqt li noqogħdu attenti għal min jesprimi l-urġenza tal-periklu fuq il-pjattaforma tagħna.

Biex inrawmu pjattaforma sigura, dawn ir-regoli ma jħallux lil min juża Snapchat għat-theddid, fosthom kull xorta ta' kontenut li juri l-ħsieb li ssir ħsara fiżika jew emozzjonali serja lil xi persuna, grupp ta' nies jew il-propjetà tagħhom. Meta l-kontenut juri li hemm theddida serja għall-ħajja tal-bniedem, it-timijiet tagħna jafu jgħarrfu lill-infurzar tal-liġi biex jieħdu l-każ f'idhom.

Lanqas ma nħallu li jittella' kontenut li jfaħħar jew li jista' jkebbes il-vjolenza jew l-imġiba li tagħmel il-ħsara lin-nies jew lill-annimali––fost dan hemm kontenut li jħeġġeġ jew ifaħħar il-ħsara fuqek innifsek bħal, ngħidu aħna, suwiċidju, tneħħija tal-partijiet ta' ġismek stess jew problemi tas-saħħa marbuta mal-ikel.

Meta l-utenti jirrappurtawlna l-kontenut li juri li hemm xi riskju li bniedem jagħmel il-ħsara lilu nnifsu, it-timijiet tagħna jqisu dawn ir-rapporti bil-għan li jaqsmu xi riżorsi siewja u biex, fejn ikunu jistgħu, jgħaddu l-każ f'id is-servizz tal-emerġenza. Tista' ssib iktar informazzjoni dwar ir-riżorsi tas-sigurtà tagħna fiċ-Ċentru tal-Privatezza u s-Sigurtà tagħna.

Biex inkomplu nrawmu l-benesseri tal-komunità tagħna, il-faċilità Here For You tagħna turi r-riżorsi miġjuba minn imsieħba esperti tal-post meta l-utenti jfittxu xi suġġetti marbuta mas-saħħa tal-moħħ, mal-istress, mad-dipressjoni, mas-suwiċidju, man-niket u mal-bullying.

Punti Ewlenin

Ir-reazzjonijiet tagħna għat-theddid, għall-vjolenza u għall-ħsara huma addattati għas-sitwazzjoni. Jekk xi ħadd jhedded li se jagħmel il-ħsara lilu nnifsu, it-tim tagħna jipprova jifhem l-aqwa mod kif jgħinu bir-riżorsi tas-sigurtà. Meta jkun hemm xi ħadd ieħor mhedded, aħna nippruvaw niżguraw is-sigurtà kemm bit-twettiq tal-politiki tagħna u, fejn meħtieġ, flimkien mal-infurzar tal-liġi.

Għall-kumpanija tagħna, importanti ħafna li nagħtu sehemna biex inrawmu s-sigurtà u l-benesseri tal-komunità tagħna. Żur iċ-Ċentru tal-Privatezza u tas-Sigurtà ta' Snap għal iktar informazzjoni dwar il-ħidma tagħna f'dan il-qasam.

Li Jmiss:

Informazzjoni Qarrieqa jew Falza li Tagħmel il-Ħsara

Read Next