Ir-Regoli tal-Komunità tagħna marbuta mal-Informazzjoni Qarrieqa jew Falza jaqgħu taħt żewġ kategoriji differenti, imma relatati, ta' mġiba li tagħmel il-ħsara: (1) informazzjoni falza u (2) imġiba qarrieqa jew spam.
1. Informazzjoni Falza
Il-kontenut li jgħawweġ il-fatti jista' jagħmel ħsara kbira lill-utenti u lis-soċjetà. Nafu li kultant taf tkun iebsa tkun taf x'inhu preċiż, l-iktar fejn jidħlu aħbarijiet friski jew suġġetti kumplikati bħalma huma x-xjenza, is-saħħa u l-aħbarijiet internazzjonali. Minħabba f'hekk, il-politiki tagħna ma jiffukawx biss fuq jekk l-informazzjoni hix falza jew qarrieqa, imma anki lejn il-ħsara li tista' tagħmel.
Hemm għadd ta' kategoriji ta' informazzjoni fejn it-tagħwiġ tal-fatti jista' jwassal għal riskji uniċi. F'dawn l-oqsma, it-timijiet tagħna se jneħħu l-kontenut li hu qarrieqi jew falz, anki jekk it-tagħwiġ tal-fatti ma kienx intenzjonat. B'hekk, il-politiki tagħna jħarsu kontra kull xorta ta' theddid mill-informazzjoni, fosthom it-tagħwiġ tal-informazzjoni, l-informazzjoni ħażina, l-informazzjoni qarrieqa u midja manipulata.
Eżempji tal-kategoriji ta' informazzjoni li nqisu li huma l-iktar vulnerabbli għall-ħsara jinkludu dawn li ġejjin:
Kontenut li jiċħad li qatt seħħew ġrajjiet traġiċi. Ma naċċettawx kontenut li jirrifjuta li ġrajjiet traġiċi seħħew tassew, bħal, ngħidu aħna, l-Olokawst, jew li jiċħad l-isparaturi li ġraw fl-iskola Sandy Hook. It-tagħwiġ tal-fatti u t-teoriji komplottisti bla prova marbuta ma' dawn it-traġedji jistgħu jwasslu għall-vjolenza u għall-mibegħda, kif ukoll jagħmlu ħsara lill-ħajja u lill-familji tal-utenti li ġew milquta minn dawn il-ġrajjiet.
Kontenut li jagħmel stqarrijiet mediċi mingħajr provi. Ma naċċettawx kontenut li, ngħidu aħna, jissuġġerixxi terapiji mhux ippruvati għall-prevenzjoni tat-tixrid ta' COVID-19; li jxerred teoriji komplottisti mingħajr prova dwar it-tilqim; jew li jħeġġeġ proċeduri magħrufin li jagħmlu l-ħsara u li ma jaħdmux bħall-“terapiji ta' konverżjoni”. Għalkemm nifhmu li l-qasam tal-mediċina kontinwament jinbidel, u l-aġenziji tas-saħħa jistgħu jirrevedu l-gwidi tagħhom ta' sikwit, it-tali għaqdiet kredibbli huma suġġett għal standards li jridu jimxu magħhom u għandhom min jgħarbel xogħolhom u nistgħu naraw x'qed jgħidu biex nifhmu x'inhuma l-pariri responsabbli fejn jidħlu s-saħħa u l-mediċina.
Kontenut li jxekkel l-integrità tal-proċessi ċiviċi. L-elezzjonijiet u l-proċessi ċiviċi l-oħra huma kruċjali fil-ħidma tas-soċjetajiet li jħarsu l-jeddijiet u għalhekk ħafna drabi jiġu użati b'mod uniku għall-manipulazzjoni tal-informazzjoni. Biex inħarsu l-ambjent ta' informazzjoni madwar dawn ix-xorta ta' ġrajjiet, aħna nwettqu l-politiki tagħna biex jgħoddu għal dawn it-tipi ta' theddidiet għall-proċessi ċiviċi li ġejjin:
Indħil fil-proċeduri: informazzjoni ħażina marbuta mal-elezzjonijiet jew il-proċessi ċiviċi fis-seħħ bħal, l-għoti ta' informazzjoni ħażina dwar dati u ħinijiet importanti jew dwar dak li hu meħtieġ biex wieħed jieħu sehem fil-proċess.
Indħil fis-sehem: kontenut li fih theddid għas-sigurtà personali jew li jxerred l-għidut biex iriegħex lin-nies milli jieħdu sehem f'elezzjoni jew proċess ċiviku.
Sehem qarrieqi jew kontra l-liġi: kontenut li jħeġġeġ lin-nies jużaw identità b'oħra biex jieħdu sehem fi proċess ċiviku jew biex jivvutaw kontra l-liġi jew jeqirdu l-vot.
Nuqqas ta' fiduċja fil-proċessi ċiviċi: kontenut bl-għan li jtellef il-fiduċja fl-istituzzjonijiet demokratiċi bi stqarrijiet foloz jew qarrieqa bħal, ngħidu aħna, dwar ir-riżultati tal-elezzjonijiet.
Mal-politiki tagħna kontra l-informazzjoni falza li tagħmel il-ħsara, hemm ukoll ħafna ħarsien u regoli dwar ir-riklami li fassalna biex inrażżnu l-popolarità ta' dal-kontenut, inkunu iktar trasparenti u nagħtu importanza ikbar lill-kontenut awtentiku fuq il-pjattaforma tagħna. Aqra dal-artiklu tal-blogg għal iktar informazzjoni dwar kif il-pjattaforma tagħna tfasslet biex tilħaq dal-għanijiet.
2. Imġiba Qarrieqa u Spam
Il-qerq u l-ispam jista' jwassal għal ħsarat finanzjarji, riskji diġitali u riskji legali serji għall-iSnapchatters (mingħajr ma nsemmu esperjenzi koroh u mhux mixtieqa). Biex innaqqsu dar-riskji, ma naċċettaw l-ebda mġiba qarrieqa li tnaqqas mill-fiduċja fil-komunità tagħna.
Fost l-imġibiet li ma naċċettawx hemm il-kontenut li jirriklama xi forma ta' qerq, skemi biex tagħmel il-flus malajr, kontenut imħallas jew sponsorjat mingħajr permess jew mingħajr ma jgħarraf l-utenti u r-riklami ta' oġġetti jew servizzi qarrieqa bħal oġġetti tad-ditta, dokumenti jew ċertifikati foloz. Lanqas ma naċċettaw li jkun hemm offerti għall-ħlas għal kull segwaċi jew skemi oħra biex iżżid is-segwaċi, ir-riklami ta' apps spam u r-riklami għat-tiswiq bis-saffi jew skemi piramida. Lanqas ma naċċettaw xi xorta ta' riċiklaġġ tar-riżorsi finanzjarji (fosthom il-ġarr jew iż-żamma tal-flus f'isem jew għal ħaddieħor). Dan jiġbor fih li taċċetta u tibgħat flus miksuba kontra l-liġi jew mingħand xi ħadd mhux magħruf f'isem ħaddieħor, tmexxija ta' flus jew servizzi tal-kambju tal-muniti li jmorru kontra l-liġi jew li m'għandhomx permess jaħdmu ,u t-tiftix ta' klijenti jew ir-riklami ta' dal-għemil.
Fl-aħħar nett, skont il-politiki tagħna ma tistax tagħmilha tabirruħek li int xi ħadd (jew xi ħaġa) li m'intix biex tqarraq lin-nies dwar min int. Dan jiġbor fih li tagħmilha tabirruħek li int xi ħadd minn sħabek, xi bniedem magħruf, xi ditta jew xi għaqdiet oħra. Dawn ir-regoli jfissru li ma tistax tikkopja d-disinn tad-ditta Snapchat jew Snap, Inc.