Ir-Regoli tal-Komunità tagħna relatati ma' Prattiki Foloz jew Qarrieqa li Jagħmlu l-Ħsara jkopru kategoriji distinti, iżda relatati, ta' ħsara: (1) informazzjoni falza li tagħmel il-ħsara, (2) impersonazzjoni, (3) frodi, u (4) spam.
1. Informazzjoni Qarrieqa li Tagħmel il-Ħsara
Kontenut li jgħawweġ il-fatti jista' jkollu konsegwenzi ta' ħsara għall-utenti u għas-soċjetà. Nafu li xi kultant jista' jkun diffiċli li tkun taf x'inhu preċiż, partikolarment meta niġu għal avvenimenti attwali li qed jiżviluppaw malajr, jew kwistjonijiet ikkumplikati tax-xjenza, is-saħħa, u l-affarijiet dinjija. Għal din ir-raġuni, il-politiki tagħna jiffokaw mhux biss fuq jekk l-informazzjoni hijiex żbaljata jew qarrieqa, iżda wkoll fuq il-potenzjal tagħha li tagħmel ħsara.
Hemm diversi kategoriji ta' informazzjoni fejn ir-rappreżentazzjoni ħażina tal-fatti tista' toħloq perikli uniċi. F'dawn l-oqsma, it-timijiet tagħna jieħdu azzjoni kontra kontenut li jkun qarrieqi jew mhux preċiż, irrispettivament minn jekk ir-rappreżentazzjonijiet żbaljati humiex intenzjonali. B'dan il-mod, il-politiki tagħna joperaw kontra kull forma ta' theddid għall-informazzjoni, inklużi informazzjoni żbaljata, diżinformazzjoni, informazzjoni ħażina, u midja manipulata.
Fost il-kategoriji tal-informazzjoni li nqisu li għandhom l-ikbar ċans jagħmlu l-ħsara hemm dawn li ġejjin:
Kontenut li jiċħad l-eżistenza ta' ġrajjiet traġiċi. Aħna nipprojbixxu kontenut li jikkontesta jew jiċħad il-ġrajjiet ta', pereżempju, l-Olokawst jew l-isparatura fl-iskola ta' Sandy Hook fl-Istati Uniti. Rappreżentazzjonijiet ħżiena u teoriji bla bażi dwar traġedji bħal dawn jistgħu jikkontribwixxu għall-vjolenza u l-mibegħda, minbarra li jagħmlu ħsara lill-utenti li ħajjithom u l-familji tagħhom ġew milquta minn ġrajjiet bħal dawn.
Kontenut li jagħmel stqarrijiet tas-saħħa mingħajr provi. Aħna nipprojbixxu kontenut li, pereżempju, jirrakkomanda terapiji mhux ittestjati għall-prevenzjoni tat-tixrid tal-COVID-19; li fih teoriji bla bażi dwar il-vaċċini; jew li jippromwovi prattiki miċħuda u ta’ ħsara bħall-hekk imsejħa “terapija ta’ konverżjoni.” Filwaqt li l-qasam tal-mediċina dejjem qed jinbidel, u l-aġenziji tas-saħħa pubblika spiss jistgħu jirrevedu l-gwida, organizzazzjonijiet kredibbli bħal dawn huma soġġetti għal standards u responsabbiltà u nistgħu nħarsu lejhom biex jipprovdu punt ta' riferiment għal gwida responsabbli dwar is-saħħa u l-mediċina.
Kontenut li jxekkel l-integrità tal-proċessi ċiviċi. L-elezzjonijiet u proċessi ċiviċi oħra għandhom rwol essenzjali fil-funzjonament ta’ soċjetajiet li jirrispettaw id-drittijiet, u jippreżentaw ukoll miri uniċi għall-manipulazzjoni tal-informazzjoni. Biex nissalvagwardjaw l-ambjent tal-informazzjoni madwar avvenimenti bħal dawn, aħna ninfurzaw il-politiki tagħna biex japplikaw għat-tipi li ġejjin ta’ theddid għall-proċessi ċiviċi:
Indħil fil-proċeduri: informazzjoni ħażina marbuta mal-elezzjonijiet jew il-proċessi ċiviċi fis-seħħ bħal, ngħidu aħna, l-għoti tal-informazzjoni ħażina dwar dati u ħinijiet importanti jew dwar dak li hu meħtieġ biex wieħed jieħu sehem fil-proċess.
Indħil fis-sehem: kontenut li fih theddid għas-sigurtà personali jew li jxerred l-għidut biex iriegħex lin-nies milli jieħdu sehem f'elezzjoni jew proċess ċiviku.
Sehem frawdolenti jew kontra l-liġi: kontenut li jħeġġeġ lin-nies jigdbu dwar l-identità tagħhom biex jieħdu sehem fi proċess ċiviku jew biex jivvutaw illegalment jew jeqirdu l-vot.
Nuqqas ta' fiduċja fil-proċessi ċiviċi: kontenut bl-għan li jtellef il-fiduċja fl-istituzzjonijiet demokratiċi fuq bażi ta' stqarrijiet foloz jew qarrieqa bħal, ngħidu aħna, dwar ir-riżultati tal-elezzjonijiet.
2. Impersonazzjoni
Il-politiki tagħna jipprojbixxu li wieħed jippretendi li hu xi ħadd (jew xi ħaġa) li m'intix, jew li jipprova jqarraq lin-nies dwar min int. Dan jinkludi li tagħmel impersonazzjoni ta' ħbiebek, konoxxenti tiegħek, ċelebritajiet, marki, jew organizzazzjonijiet oħra. Filwaqt li l-kontijiet tas-segwaċi, tas-satira, u tal-kummentarji ġeneralment huma permessi, dawn iridu jkunu trasparenti u jiżvelaw dan il-fatt b'mod espliċitu, inkluż fl-isem muri.
3. Frodi
Il-frodi tista' tesponi lil Snapchatters għal ħsara finanzjarja, riskji taċ-ċibersigurtà, u anke riskju legali. Biex ngħinu nnaqqsu dawn ir-riskji, nipprojbixxu prattiki qarrieqa li jdgħajfu l-fiduċja fil-komunità tagħna.
Il-prattiki pprojbiti jinkludu kontenut li jippromwovi scams ta’ kwalunkwe tip; skemi biex wieħed isir sinjur malajr; kontenut imħallas jew sponsorjat mhux awtorizzat jew mhux żvelat; kummerċjalizzazzjoni f’diversi livelli jew skemi piramidali; u l-promozzjoni ta’ oġġetti jew servizzi frodulenti, inklużi oġġetti jew dokumenti foloz, u l-bejgħ ta’ kontijiet tal-midja soċjali, inklużi kontijiet ta’ Snapchat.
Nipprojbixxu wkoll il-ħasil tal-flus (inklużi l-kurrier tal-flus jew il-money muling) ta' kwalunkwe tip. Dan jinkludi li wieħed jirċievi u jittrasferixxi flus li jinkisbu illegalment jew minn għajn / sors mhux magħruf f'isem xi ħadd ieħor, trażmissjoni ta' flus jew servizzi ta' skambju ta' munita mhux awtorizzati u illegali, u li jitlob u jippromwovi dawn l-attivitajiet.
Fl-aħħar nett, il-politiki tagħna jipprojbixxu l-imitazzjoni tal-branding ta' Snapchat jew Snap Inc. sabiex iqarrqu b'utenti oħra.
4. Spam
L-ispam jista’ jkun konfuż u tedjanti għal dawk li jużaw Snapchat. Aħna nipprojbixxu prattiki bħal dawn, inklużi li jiżdiedu b'mod artifiċjali l-interazzjonijiet, bħal skemi ta' ħlas għal kull segwaċi jew skemi oħra ta' tkabbir tas-segwaċi; il-promozzjoni ta' applikazzjonijiet ta' spam; jew pubblikazzjoni jew il-qsim tal-massa, ripetittiva jew frekwenti.
