Snapchat ਵਿੱਚ ਅਸੀਂ ਆਪਣੇ ਭਾਈਚਾਰੇ ਦੇ ਪਰਦੇਦਾਰੀ ਹਿੱਤਾਂ ਦਾ ਆਦਰ ਕਰਦੇ ਹੋਏ ਸੁਰੱਖਿਆ ਵਿੱਚ ਵਾਧਾ ਕਰਨ ਲਈ ਵਚਨਬੱਧ ਹਾਂ। ਅਸੀਂ ਸੰਭਾਵੀ ਨੁਕਸਾਨਾਂ ਦਾ ਮੁਕਾਬਲਾ ਕਰਨ ਲਈ ਸੰਤੁਲਨ, ਜੋਖਮ-ਅਧਾਰਤ ਨਜ਼ਰੀਏ ਨੂੰ ਅਪਣਾਉਂਦੇ ਹਾਂ — ਪਾਰਦਰਸ਼ੀ ਸਮੱਗਰੀ ਸੰਚਾਲਨ ਅਭਿਆਸਾਂ, ਇਕਸਾਰ ਅਤੇ ਬਰਾਬਰ ਅਮਲੀਕਰਨ ਅਤੇ ਸਾਡੀਆਂ ਨੀਤੀਆਂ ਨੂੰ ਨਿਰਪੱਖਤਾ ਨਾਲ ਲਾਗੂ ਕਰਨ ਲਈ ਆਪਣੇ ਆਪ ਨੂੰ ਜਵਾਬਦੇਹ ਠਹਿਰਾਉਣ ਲਈ ਸਪਸ਼ਟ ਸੰਚਾਰ ਨੂੰ ਜੋੜ ਕੇ ਕੰਮ ਕਰਦੇ ਹਾਂ।

ਸਮੱਗਰੀ ਸੰਚਾਲਨ

ਅਸੀਂ ਸੁਰੱਖਿਆ ਨੂੰ ਧਿਆਨ ਵਿੱਚ ਰੱਖ ਕੇ Snapchat ਨੂੰ ਡਿਜ਼ਾਈਨ ਕੀਤਾ ਹੈ ਅਤੇ ਇਹ ਡਿਜ਼ਾਈਨ ਸੰਭਾਵਿਤ ਤੌਰ 'ਤੇ ਨੁਕਸਾਨਦੇਹ ਸਮੱਗਰੀ ਦੇ ਫੈਲਣ ਨੂੰ ਰੋਕਣ ਵਿੱਚ ਮਦਦ ਲਈ ਮਹੱਤਵਪੂਰਨ ਹੈ। ਉਦਾਹਰਨ ਲਈ, Snapchat ਖੁੱਲ੍ਹੀ ਖ਼ਬਰ ਫੀਡ ਦੀ ਪੇਸ਼ਕਸ਼ ਨਹੀਂ ਕਰਦੀ ਜਿੱਥੇ ਰਚਨਾਕਾਰਾਂ ਨੂੰ ਸੰਭਾਵੀ ਤੌਰ 'ਤੇ ਨੁਕਸਾਨਦੇਹ ਜਾਂ ਉਲੰਘਣਾ ਕਰਨ ਵਾਲੀ ਸਮੱਗਰੀ ਨੂੰ ਪ੍ਰਸਾਰਿਤ ਕਰਨ ਦਾ ਮੌਕਾ ਮਿਲਦਾ ਹੈ ਅਤੇ ਦੋਸਤਾਂ ਦੀਆਂ ਸੂਚੀਆਂ ਨਿੱਜੀ ਹੁੰਦੀਆਂ ਹਨ। 

ਇਹਨਾਂ ਡਿਜ਼ਾਈਨ ਸੁਰੱਖਿਆ ਉਪਾਵਾਂ ਤੋਂ ਇਲਾਵਾ ਅਸੀਂ ਆਪਣੀਆਂ ਜਨਤਕ ਸਮੱਗਰੀ ਦੀਆਂ ਤਹਿਆਂ (ਜਿਵੇਂ ਕਿ ਸਪੌਟਲਾਈਟ, ਜਨਤਕ ਕਹਾਣੀਆਂ ਅਤੇ ਨਕਸ਼ੇ) 'ਤੇ ਸੰਚਾਲਨ ਲਈ ਸਵੈਚਾਲਿਤ ਔਜ਼ਾਰਾਂ ਅਤੇ ਮਨੁੱਖੀ ਸਮੀਖਿਆ ਦਾ ਸੁਮੇਲ ਵਰਤਦੇ ਹਾਂ। ਜਨਤਕ ਤਹਿਆਂ 'ਤੇ ਸਿਫਾਰਸ਼ ਕੀਤੀ ਸਮੱਗਰੀ ਨੂੰ ਵੀ ਉੱਚ ਮਿਆਰ 'ਤੇ ਰੱਖਿਆ ਜਾਂਦਾ ਹੈ ਅਤੇ ਵਾਧੂ ਸੇਧਾਂ ਨੂੰ ਪੂਰਾ ਕਰਨਾ ਲਾਜ਼ਮੀ ਹੈ। ਉਦਾਹਰਨ ਵਜੋਂ, ਸਪੌਟਲਾਈਟ 'ਤੇ ਜਿੱਥੇ ਰਚਨਾਕਾਰ ਵਿਆਪਕ Snapchat ਭਾਈਚਾਰੇ ਨਾਲ ਸਾਂਝਾ ਕਰਨ ਲਈ ਰਚਨਾਤਮਕ ਅਤੇ ਮਨੋਰੰਜਕ ਵੀਡੀਓ ਸਪੁਰਦ ਕਰ ਸਕਦੇ ਹਨ, ਕਿਸੇ ਵੀ ਵੰਡ ਨੂੰ ਪ੍ਰਾਪਤ ਕਰਨ ਤੋਂ ਪਹਿਲਾਂ ਸਾਰੀ ਸਮੱਗਰੀ ਦੀ ਮਸ਼ੀਨੀ ਸੂਝ ਅਤੇ ਹੋਰ ਤਕਨਾਲੋਜੀ ਰਾਹੀਂ ਆਪਣੇ-ਆਪ ਸਮੀਖਿਆ ਕੀਤੀ ਜਾਂਦੀ ਹੈ। ਜਦੋਂ ਸਮੱਗਰੀ ਜ਼ਿਆਦਾ ਦਿਸਣ ਲੱਗਦੀ ਹੈ, ਤਾਂ ਇਸ ਨੂੰ ਜ਼ਿਆਦਾ ਦਰਸ਼ਕਾਂ ਵਿੱਚ ਵੰਡਣ ਲਈ ਸਿਫ਼ਾਰਸ਼ ਕੀਤੇ ਜਾਣ ਦਾ ਮੌਕਾ ਮਿਲਣ ਤੋਂ ਪਹਿਲਾਂ ਮਨੁੱਖੀ ਸੰਚਾਲਕਾਂ ਵੱਲੋਂ ਸਮੀਖਿਆ ਕੀਤੀ ਜਾਂਦੀ ਹੈ। ਸਪੌਟਲਾਈਟ 'ਤੇ ਸਮੱਗਰੀ ਨੂੰ ਸੰਚਾਲਿਤ ਕਰਨ ਲਈ ਇਹ ਪੱਧਰੀ ਪਹੁੰਚ ਸੰਭਾਵੀ ਤੌਰ 'ਤੇ ਨੁਕਸਾਨਦੇਹ ਸਮੱਗਰੀ ਦੇ ਫੈਲਣ ਦੇ ਜੋਖਮ ਨੂੰ ਘਟਾਉਂਦੀ ਹੈ ਅਤੇ ਹਰੇਕ ਲਈ ਮਜ਼ੇਦਾਰ ਅਤੇ ਚੰਗੇ ਤਜ਼ਰਬੇ ਨੂੰ ਉਤਸ਼ਾਹਤ ਕਰਨ ਵਿੱਚ ਮਦਦ ਕਰਦੀ ਹੈ। 

ਇਸੇ ਤਰ੍ਹਾਂ ਮੀਡੀਆ ਕੰਪਨੀਆਂ ਵੱਲੋਂ ਤਿਆਰ ਕੀਤੀ ਸੰਪਾਦਕੀ ਸਮੱਗਰੀ, ਜਿਵੇਂ ਕਿ ਪ੍ਰਕਾਸ਼ਕ ਕਹਾਣੀਆਂ ਜਾਂ ਸ਼ੋਆਂ ਨੂੰ ਸੁਰੱਖਿਆ ਅਤੇ ਅਖੰਡਤਾ ਲਈ ਉੱਚ ਮਿਆਰਾਂ 'ਤੇ ਰੱਖਿਆ ਜਾਂਦਾ ਹੈ। ਇਸ ਤੋਂ ਇਲਾਵਾ ਅਸੀਂ ਸੰਭਾਵਿਤ ਤੌਰ 'ਤੇ ਨੁਕਸਾਨਦੇਹ ਸਮੱਗਰੀ ਦੀ ਪਛਾਣ ਕਰਨ ਵਿੱਚ ਮਦਦ ਕਰਨ ਵਾਸਤੇ ਹੋਰ ਜਨਤਕ ਜਾਂ ਵੱਧ-ਦਿਸਣਯੋਗਤਾ ਵਾਲੀਆਂ ਤਹਿਆਂ - ਜਿਵੇਂ ਕਿ ਕਹਾਣੀਆ 'ਤੇ ਸਰਗਰਮ ਨੁਕਸਾਨ-ਪਛਾਣ ਤਕਨਾਲੋਜੀ ਦੀ ਵਰਤੋਂ ਕਰਦੇ ਹਾਂ ਅਤੇ ਅਸੀਂ ਅਜਿਹੀ ਸਮੱਗਰੀ (ਜਿਵੇਂ ਕਿ ਗੈਰ-ਕਨੂੰਨੀ ਨਸ਼ਿਆਂ ਜਾਂ ਹੋਰ ਗੈਰ-ਕਾਨੂੰਨੀ ਚੀਜ਼ਾਂ ਦਾ ਵਿਗਿਆਪਨ ਦੇਣ ਦੀ ਕੋਸ਼ਿਸ਼ ਕਰਨ ਵਾਲੇ ਖਾਤਿਆਂ) ਨੂੰ ਤਲਾਸ਼ ਨਤੀਜਿਆਂ ਵਿੱਚ ਦਿਸਣ ਤੋਂ ਰੋਕਣ ਵਿੱਚ ਮਦਦ ਕਰਨ ਲਈ ਮੁੱਖ-ਸ਼ਬਦ ਛਾਂਟਣ ਦੀ ਸਹੂਲਤ ਦੀ ਵਰਤੋਂ ਕਰਦੇ ਹਾਂ।  

ਸਾਡੀਆਂ ਸਾਰੀਆਂ ਉਤਪਾਦ ਤਹਿਆਂ 'ਤੇ ਵਰਤੋਂਕਾਰ ਸਾਡੀਆਂ ਨੀਤੀਆਂ ਦੀਆਂ ਸੰਭਾਵੀ ਉਲੰਘਣਾਵਾਂ ਲਈ ਖਾਤਿਆਂ ਅਤੇ ਸਮੱਗਰੀ ਦੀ ਰਿਪੋਰਟ ਕਰ ਸਕਦੇ ਹਨ। ਅਸੀਂ Snapchatters ਵਾਸਤੇ ਸਾਡੀਆਂ ਸੁਰੱਖਿਆ ਟੀਮਾਂ ਨੂੰ ਸਿੱਧੇ ਤੌਰ 'ਤੇ ਗੁਪਤ ਰਿਪੋਰਟ ਸਪੁਰਦ ਕਰਨਾ ਆਸਾਨ ਬਣਾਉਂਦੇ ਹਾਂ ਜੋ ਰਿਪੋਰਟ ਦਾ ਮੁਲਾਂਕਣ ਕਰਨ ਲਈ ਸਿਖਲਾਈ ਪ੍ਰਾਪਤ ਹਨ, ਸਾਡੀਆਂ ਨੀਤੀਆਂ ਅਨੁਸਾਰ ਢੁਕਵੀਂ ਕਾਰਵਾਈ ਕਰਦੀਆਂ ਹਨ ਅਤੇ ਰਿਪੋਰਟ ਕਰਨ ਵਾਲੇ ਨੂੰ ਨਤੀਜੇ ਬਾਰੇ ਸੂਚਿਤ ਕਰਦੀਆਂ ਹਨ--ਆਮ ਤੌਰ 'ਤੇ ਅਜਿਹਾ ਕੁਝ ਘੰਟਿਆਂ ਦੇ ਅੰਦਰ ਕੀਤਾ ਜਾਂਦਾ ਹੈ। ਸੰਭਾਵੀ ਨੁਕਸਾਨਦੇਹ ਸਮੱਗਰੀ ਜਾਂ ਵਤੀਰੇ ਦੀ ਰਿਪੋਰਟ ਕਰਨ ਬਾਰੇ ਹੋਰ ਜਾਣਕਾਰੀ ਲਈ, ਸਾਡੀ ਸਹਾਇਤਾ ਸਾਈਟ 'ਤੇ ਇਸ ਸਰੋਤ 'ਤੇ ਜਾਓ। ਤੁਸੀਂ ਇੱਥੇ ਉਲੰਘਣਾ ਕਰਨ ਵਾਲੀ ਸਮੱਗਰੀ ਦੀ ਪਛਾਣ ਕਰਨ ਅਤੇ ਹਟਾਉਣ ਦੀਆਂ ਕੋਸ਼ਿਸ਼ਾਂ ਅਤੇ Snapchat 'ਤੇ ਸੁਰੱਖਿਆ ਅਤੇ ਤੰਦਰੁਸਤੀ ਨੂੰ ਹੱਲਾਸ਼ੇਰੀ ਦੇਣ ਬਾਰੇ ਹੋਰ ਜਾਣ ਸਕਦੇ ਹੋ। ਜੇ ਤੁਹਾਡੇ ਵੱਲੋਂ ਸਪੁਰਦ ਕੀਤੀ ਰਿਪੋਰਟ ਦੇ ਨਤੀਜੇ ਬਾਰੇ ਤੁਹਾਡਾ ਕੋਈ ਸਵਾਲ ਜਾਂ ਚਿੰਤਾ ਹੈ, ਤਾਂ ਤੁਸੀਂ ਸਾਡੀ ਸਹਾਇਤਾ ਸਾਈਟ ਰਾਹੀਂ ਪੈਰਵਾਈ ਕਰ ਸਕਦੇ ਹੋ।

ਜਦੋਂ ਤੁਸੀਂ ਕੋਈ ਰਿਪੋਰਟ ਸਪੁਰਦ ਕਰਦੇ ਹੋ, ਤਾਂ ਤੁਸੀਂ ਤਸਦੀਕ ਕਰ ਰਹੇ ਹੁੰਦੇ ਹੋ ਕਿ ਇਹ ਤੁਹਾਡੇ ਗਿਆਨ ਅਨੁਸਾਰ ਸੰਪੂਰਨ ਅਤੇ ਸਹੀ ਹੈ। ਕਿਰਪਾ ਕਰਕੇ Snap ਦੀਆਂ ਰਿਪੋਰਟਿੰਗ ਪ੍ਰਣਾਲੀਆਂ ਦੀ ਦੁਰਵਰਤੋਂ ਨਾ ਕਰੋ, ਜਿਸ ਵਿੱਚ ਵਾਰ-ਵਾਰ ਨਕਲੀ ਜਾਂ ਹੋਰ "ਬੇਲੋੜੀਆਂ" ਰਿਪੋਰਟਾਂ ਭੇਜਣਾ ਸ਼ਾਮਲ ਹੈ। ਜੇ ਤੁਸੀਂ ਅਜਿਹੇ ਵਤੀਰੇ ਵਿੱਚ ਸ਼ਾਮਲ ਹੁੰਦੇ ਹੋ, ਤਾਂ ਅਸੀਂ ਤੁਹਾਡੀਆਂ ਰਿਪੋਰਟਾਂ ਦੀ ਸਮੀਖਿਆ ਨੂੰ ਅਸਵੀਕਾਰ ਕਰਨ ਦਾ ਅਧਿਕਾਰ ਰਾਖਵਾਂ ਰੱਖਦੇ ਹਾਂ। ਜੇ ਤੁਸੀਂ ਅਕਸਰ ਦੂਜਿਆਂ ਦੀ ਸਮੱਗਰੀ ਜਾਂ ਖਾਤਿਆਂ ਵਿਰੁੱਧ ਬੇਬੁਨਿਆਦ ਰਿਪੋਰਟਾਂ ਸਪੁਰਦ ਕਰਦੇ ਹੋ, ਤਾਂ ਅਸੀਂ ਤੁਹਾਨੂੰ ਚੇਤਾਵਨੀ ਭੇਜਣ ਤੋਂ ਬਾਅਦ ਤੁਹਾਡੀਆਂ ਰਿਪੋਰਟਾਂ ਦੀ ਸਮੀਖਿਆ ਨੂੰ ਇੱਕ ਸਾਲ ਤੱਕ ਮੁਅੱਤਲ ਕਰ ਸਕਦੇ ਹਾਂ ਅਤੇ ਗੰਭੀਰ ਹਲਾਤਾਂ ਵਿੱਚ ਤੁਹਾਡੇ ਖਾਤੇ ਨੂੰ ਅਯੋਗ ਕਰ ਸਕਦੇ ਹਾਂ।

Snap ਵਿਖੇ ਨੀਤੀ ਅਮਲੀਕਰਨ

Snap ਵਿਖੇ ਸਾਡੇ ਲਈ ਇਹ ਮਹੱਤਵਪੂਰਨ ਹੈ ਕਿ ਸਾਡੀਆਂ ਨੀਤੀਆਂ ਇਕਸਾਰ ਅਤੇ ਨਿਰਪੱਖ ਅਮਲੀਕਰਨ ਨੂੰ ਹੱਲਾਸ਼ੇਰੀ ਦਿੰਦੀਆਂ ਹਨ। ਅਸੀਂ ਸਾਡੀਆਂ ਭਾਈਚਾਰਕ ਸੇਧਾਂ ਦੀਆਂ ਉਲੰਘਣਾਵਾਂ ਵਾਸਤੇ ਢੁਕਵੇਂ ਜ਼ੁਰਮਾਨੇ ਤੈਅ ਕਰਨ ਲਈ ਸੰਦਰਭ, ਨੁਕਸਾਨ ਦੀ ਗੰਭੀਰਤਾ ਅਤੇ ਖਾਤੇ ਦੇ ਇਤਿਹਾਸ 'ਤੇ ਵਿਚਾਰ ਕਰਦੇ ਹਾਂ। 

ਅਸੀਂ ਉਨ੍ਹਾਂ ਖਾਤਿਆਂ ਨੂੰ ਤੁਰੰਤ ਅਯੋਗ ਕਰ ਦਿੰਦੇ ਹਾਂ ਜਿਨ੍ਹਾਂ ਬਾਰੇ ਅਸੀਂ ਤੈਅ ਕਰਦੇ ਹਾਂ ਕਿ ਉਹ ਗੰਭੀਰ ਨੁਕਸਾਨ ਕਰਨ ਵਿੱਚ ਸ਼ਾਮਲ ਹਨ। ਗੰਭੀਰ ਨੁਕਸਾਨਾਂ ਦੀਆਂ ਉਦਾਹਰਨਾਂ ਵਿੱਚ ਬੱਚਿਆਂ ਦਾ ਜਿਨਸੀ ਸ਼ੋਸ਼ਣ ਜਾਂ ਮਾੜੇ ਸਲੂਕ, ਗੈਰ-ਕਨੂੰਨੀ ਨਸ਼ੀਲੇ ਪਦਾਰਥਾਂ ਦੀ ਵੰਡ ਦੀ ਕੋਸ਼ਿਸ਼ ਅਤੇ ਹਿੰਸਕ ਕੱਟੜਪੰਥੀ ਜਾਂ ਅੱਤਵਾਦੀ ਸਰਗਰਮੀ ਦਾ ਪ੍ਰਚਾਰ ਸ਼ਾਮਲ ਹੈ।

ਅਸੀਂ ਸਾਡੀਆਂ ਭਾਈਚਾਰਕ ਸੇਧਾਂ ਦੀ ਉਲੰਘਣਾ ਕਰਨ ਲਈ ਮੁੱਖ ਤੌਰ 'ਤੇ ਬਣਾਏ ਜਾਂ ਵਰਤੇ ਖਾਤਿਆਂ ਨੂੰ ਵੀ ਅਯੋਗ ਕਰ ਦਿੰਦੇ ਹਾਂ, ਭਾਵੇਂ ਘੱਟ ਗੰਭੀਰ ਨੁਕਸਾਨ ਕੀਤਾ ਹੋਵੇ। ਉਦਾਹਰਨ ਲਈ, ਅਜਿਹਾ ਖਾਤਾ ਜੋ ਉਲੰਘਣਾ ਕਰਨ ਵਾਲੀ ਸਮੱਗਰੀ ਪੋਸਟ ਕਰਦਾ ਹੈ ਅਤੇ ਜਿਸ ਵਿੱਚ ਉਲੰਘਣਾ ਕਰਨ ਵਾਲਾ ਵਰਤੋਂਕਾਰ-ਨਾਮ ਜਾਂ ਡਿਸਪਲੇ ਨਾਮ ਹੁੰਦਾ ਹੈ, ਉਸ ਨੂੰ ਤੁਰੰਤ ਅਯੋਗ ਕੀਤਾ ਜਾ ਸਕਦਾ ਹੈ। 

ਸਾਡੀਆਂ ਭਾਈਚਾਰਕ ਸੇਧਾਂ ਦੀਆਂ ਹੋਰ ਉਲੰਘਣਾਵਾਂ ਲਈ Snap ਆਮ ਤੌਰ 'ਤੇ ਤਿੰਨ-ਹਿੱਸਿਆਂ ਦੀ ਅਮਲੀਕਰਨ ਪ੍ਰਕਿਰਿਆ ਦੀ ਪਾਲਣਾ ਕਰਦਾ ਹੈ:

• ਕਦਮ ਇੱਕ: ਉਲੰਘਣਾ ਕਰਨ ਵਾਲੀ ਸਮੱਗਰੀ ਨੂੰ ਹਟਾਇਆ ਜਾਂਦਾ ਹੈ।

• ਕਦਮ ਦੋ: Snapchatter ਨੂੰ ਸੂਚਨਾ ਮਿਲਦੀ ਹੈ ਜੋ ਇਹ ਦਰਸਾਉਂਦੀ ਹੈ ਕਿ ਉਨ੍ਹਾਂ ਨੇ ਸਾਡੀਆਂ ਭਾਈਚਾਰਕ ਸੇਧਾਂ ਦੀ ਉਲੰਘਣਾ ਕੀਤੀ ਹੈ ਅਤੇ ਉਨ੍ਹਾਂ ਦੀ ਸਮੱਗਰੀ ਨੂੰ ਹਟਾ ਦਿੱਤਾ ਗਿਆ ਹੈ ਅਤੇ ਵਾਰ-ਵਾਰ ਉਲੰਘਣਾ ਕਰਨ ਦੇ ਨਤੀਜੇ ਵਜੋਂ ਉਹਨਾਂ ਦੇ ਖਾਤੇ ਨੂੰ ਅਯੋਗ ਕਰਨ ਸਮੇਤ ਵਾਧੂ ਅਮਲੀਕਰਨ ਕਾਰਵਾਈਆਂ ਕੀਤੀਆਂ ਜਾਣਗੀਆਂ।

• ਕਦਮ ਤਿੰਨ: ਸਾਡੀ ਟੀਮ Snapchatter ਦੇ ਖਾਤੇ ਵਿਰੁੱਧ 'ਸਟ੍ਰਾਈਕ' ਰਿਕਾਰਡ ਕਰਦੀ ਹੈ।

ਸਟ੍ਰਾਈਕ ਕਿਸੇ ਖਾਸ Snapchatter ਵੱਲੋਂ ਕੀਤੀਆਂ ਉਲੰਘਣਾਵਾਂ ਦਾ ਰਿਕਾਰਡ ਬਣਾਉਂਦੀ ਹੈ। Snapchatter ਨੂੰ ਸਟ੍ਰਾਈਕਾਂ ਦੇ ਨਾਲ ਨੋਟਿਸ ਵੀ ਮਿਲਦਾ ਹੈ। ਜੇ ਕੋਈ Snapchatter ਤੈਅ ਸਮੇਂ ਵਿੱਚ ਬਹੁਤ ਸਾਰੀਆਂ ਸਟ੍ਰਾਈਕਾਂ ਹਾਸਲ ਕਰਦਾ ਹੈ, ਤਾਂ ਉਸ ਦਾ ਖਾਤਾ ਅਯੋਗ ਕਰ ਦਿੱਤਾ ਜਾਵੇਗਾ। ਇਹ ਸ਼ਿਕਾਇਤ ਪ੍ਰਣਾਲੀ ਇਹ ਯਕੀਨੀ ਬਣਾਉਣ ਵਿੱਚ ਮਦਦ ਕਰਦੀ ਹੈ ਕਿ ਅਸੀਂ ਭਾਈਚਾਰਕ ਸੇਧਾਂ ਨੂੰ ਲਗਾਤਾਰ ਅਤੇ ਇਸ ਤਰੀਕੇ ਨਾਲ ਲਾਗੂ ਕਰਦੇ ਹਾਂ ਜਿਸ ਨਾਲ ਵਰਤੋਂਕਾਰਾਂ ਨੂੰ ਚੇਤਾਵਨੀ ਅਤੇ ਸਿੱਖਿਆ ਮਿਲਦੀ ਹੈ। 

ਨੋਟਿਸ ਅਤੇ ਅਪੀਲਾਂ ਦੀਆਂ ਪ੍ਰਕਿਰਿਆਵਾਂ

Snapchatters ਨੂੰ ਇਹ ਗੱਲ ਸਾਫ਼ ਤਰੀਕੇ ਨਾਲ ਸਮਝਣ ਵਿੱਚ ਮਦਦ ਲਈ ਕਿ ਉਨ੍ਹਾਂ ਦੇ ਵਿਰੁੱਧ ਕੋਈ ਕਾਰਵਾਈ ਕਿਉਂ ਕੀਤੀ ਗਈ ਅਤੇ ਅਪੀਲ ਕਰਨ ਦਾ ਮੌਕਾ ਦਿੱਤਾ ਗਿਆ, ਅਸੀਂ ਨੋਟਿਸ ਅਤੇ ਅਪੀਲ ਪ੍ਰਕਿਰਿਆਵਾਂ ਦੀ ਸਥਾਪਨਾ ਕੀਤੀ ਹੈ ਜਿਨ੍ਹਾਂ ਦਾ ਉਦੇਸ਼ Snapchatters ਦੇ ਅਧਿਕਾਰਾਂ ਦੀ ਸੁਰੱਖਿਆ ਕਰਦੇ ਹੋਏ ਸਾਡੇ ਭਾਈਚਾਰੇ ਦੇ ਹਿੱਤਾਂ ਦੀ ਸੁਰੱਖਿਆ ਕਰਨਾ ਹੈ।

ਅਸੀਂ ਸਾਡੀਆਂ ਭਾਈਚਾਰਕ ਸੇਧਾਂ ਅਤੇ ਸੇਵਾ ਦੀਆਂ ਮਦਾਂ ਨੂੰ ਉਦੋਂ ਲਾਗੂ ਕਰਦੇ ਹਾਂ ਜਦੋਂ ਅਸੀਂ ਮੁਲਾਂਕਣ ਕਰਦੇ ਹਾਂ ਕਿ ਕਿਸੇ ਖਾਤੇ ਵਿਰੁੱਧ ਜ਼ੁਰਮਾਨੇ ਲਾਗੂ ਕਰਨਾ ਹੈ ਜਾਂ ਨਹੀਂ ਅਤੇ ਪ੍ਰਸਾਰਿਤ ਜਾਂ ਸਿਫ਼ਾਰਸ਼ ਕੀਤੀ ਸਮੱਗਰੀ ਨੂੰ ਸੰਚਾਲਿਤ ਕਰਨ ਲਈ ਸਾਡੀਆਂ ਭਾਈਚਾਰਕ ਸੇਧਾਂ, ਸੇਵਾ ਦੀਆਂ ਮਦਾਂ ਅਤੇ ਸਿਫ਼ਾਰਸ਼ ਯੋਗਤਾ ਲਈ ਸਮੱਗਰੀ ਸੇਧਾਂ ਨੂੰ ਲਾਗੂ ਕਰਦੇ ਹਾਂ। ਸਾਡੀਆਂ ਅਪੀਲ ਪ੍ਰਕਿਰਿਆਵਾਂ ਕਿਵੇਂ ਕੰਮ ਕਰਦੀਆਂ ਹਨ ਇਸ ਬਾਰੇ ਜਾਣਕਾਰੀ ਲਈ, ਅਸੀਂ ਖਾਤਾ ਅਪੀਲਾਂ ਅਤੇ ਸਮੱਗਰੀ ਅਪੀਲਾਂ ਬਾਰੇ ਸਹਾਇਤਾ ਲੇਖਾਂ ਨੂੰ ਵਿਕਸਿਤ ਕੀਤਾ ਹੈ। ਜਦੋਂ Snapchat ਖਾਤਾ ਲੌਕ ਕੀਤੇ ਜਾਣ ਵਿਰੁੱਧ ਅਪੀਲ ਮੰਨਦੀ ਹੈ, ਤਾਂ Snapchatter ਦੇ ਖਾਤੇ ਤੱਕ ਪਹੁੰਚ ਬਹਾਲ ਹੋ ਜਾਵੇਗੀ। ਭਾਵੇਂ ਅਪੀਲ ਸਫਲ ਹੁੰਦੀ ਹੈ ਜਾਂ ਨਹੀਂ, ਅਸੀਂ ਅਪੀਲ ਕਰਨ ਵਾਲੀ ਧਿਰ ਨੂੰ ਸਮੇਂ ਸਿਰ ਆਪਣੇ ਫੈਸਲੇ ਬਾਰੇ ਸੂਚਿਤ ਕਰਦੇ ਹਾਂ।

ਕਿਰਪਾ ਕਰਕੇ ਆਪਣੀ ਅਪੀਲ ਬਾਰੇ ਵਾਰ-ਵਾਰ ਬੇਨਤੀਆਂ ਸਪੁਰਦ ਕਰਕੇ Snap ਦੀ ਅਪੀਲ ਵਿਧੀ ਦੀ ਦੁਰਵਰਤੋਂ ਨਾ ਕਰੋ। ਜੇ ਤੁਸੀਂ ਇਸ ਵਤੀਰੇ ਵਿੱਚ ਸ਼ਾਮਲ ਹੁੰਦੇ ਹੋ, ਤਾਂ ਅਸੀਂ ਤੁਹਾਡੀਆਂ ਬੇਨਤੀਆਂ ਦੀ ਸਮੀਖਿਆ ਨੂੰ ਘੱਟ ਤਰਜੀਹ ਦੇਣ ਦਾ ਅਧਿਕਾਰ ਰਾਖਵਾਂ ਰੱਖਦੇ ਹਾਂ। ਜੇ ਤੁਸੀਂ ਅਕਸਰ ਬੇਬੁਨਿਆਦ ਅਪੀਲਾਂ ਸਪੁਰਦ ਕਰਦੇ ਹੋ, ਤਾਂ ਅਸੀਂ ਤੁਹਾਨੂੰ ਚੇਤਾਵਨੀ ਭੇਜਣ ਤੋਂ ਬਾਅਦ ਤੁਹਾਡੀਆਂ ਅਪੀਲਾਂ (ਸੰਬੰਧਿਤ ਬੇਨਤੀਆਂ ਸਮੇਤ) ਦੀ ਸਮੀਖਿਆ ਨੂੰ ਇੱਕ ਸਾਲ ਤੱਕ ਮੁਅੱਤਲ ਕਰ ਸਕਦੇ ਹਾਂ।