Snap hi impenjata li tirrispetta d-drittijiet tal-bniedem, kif stabbilit fil-Prinċipji Gwida tan-Nazzjonijiet Uniti dwar in-Negozju u d-Drittijiet tal-Bniedem (UNGPs). Inkorporajna kunsiderazzjonijiet tad-drittijiet tal-bniedem fil-Linji Gwida tal-Komunità tagħna, fil-prattiki tal-filtrazzjoni tal-kontenut, fir-rappurtar tat-trasparenza, u fil-prattiki tal-privatezza, inkluż permezz tal-miżuri li ġejjin:

• Ir-Regoli tal-Komunità. Fil-Linji Gwida tal-Komunità u l-ħoloq bit-tagħrif, aħna trasparenti dwar dak li tista' u dak li ma tistax tagħmel fuq il-pjattaforma. Naħdmu mat-timijiet tas-sigurtà tagħna biex ngħinu niżguraw li dal-politiki jitwettqu b'ġustizzja u bl-istess mod ma' kulħadd. Aħna u nwettqu dar-regoli, inqisu l-ilsna u l-kulturi tal-post u għandna proċess tal-appelli u riżorsi siewja għall-utenti.

• Trasparenza. Aħna nippubblikaw volontarjament rapporti ta' trasparenza darbtejn fis-sena bħala parti mill-impenn tagħna għas-sikurezza, it-trasparenza, u r-responsabbiltà, flimkien ma' rapporti oħra ta' trasparenza meħtieġa legalment. Aħna naħdmu b'mod konsistenti biex dawn ir-rapporti jkunu aktar komprensivi u informattivi għall-partijiet interessati tagħna.

• Privatezza. Naħdmu biex nipproteġu d-data u l-privatezza tal-utent permezz tal-Politika tal-Privatezza tagħna, il-Linji Gwida tal-Komunità, u l-protokolli tal-protezzjoni tad-data. Aħna nipprojbixxu lill-utenti milli jiksru l-privatezza ta' ħaddieħor fuq il-pjattaforma tagħna jew permezz tas-servizzi tagħna, u għandna prinċipji stretti tal-privatezza fis-seħħ għall-aċċess tal-impjegati għad-data tal-utenti.

• Ħelsien tal-kelma. Nagħtu s-setgħa lill-utenti tagħna biex jesprimu ruħhom b'mod ġenwin u kreattiv. Qabel inneħħu l-kontenut jew inwiddbu, nimblukkaw jew nagħlqu l-kontijiet, inqisu l-ilsien u l-kultura tal-post kif ukoll kuntesti li jafu jkunu ta' tagħlim, suġġetti popolari jew ta' interess ġenerali. 

• Kontra t-terroriżmu. Entitajiet terroristiċi u estremisti vjolenti huma pprojbiti milli jużaw il-pjattaforma tagħna. Nipprojbixxu wkoll kontenut li jippromwovi t-terroriżmu jew atti vjolenti jew kriminali oħra mwettqa minn individwi jew gruppi għal għanijiet ideoloġiċi ulterjuri, kif ukoll kontenut li jippromwovi jew jappoġġja organizzazzjonijiet terroristiċi barranin jew gruppi estremisti vjolenti.

• Kontra t-traffikar Ma naċċettawx li l-pjattaforma jew is-servizzi tagħna jintużaw għat-traffikar tal-bnedmin fosthom traffikar sesswali, xogħol sfurzat, għemil kriminali mġiegħel, traffikar tal-organi u żwiġijiet ta' bilfors. 

• Kontra d-diskriminazzjoni. Fuq il-pjattaforma tagħna ma naċċettawx id-diskriminazzjoni. Nagħmlu hekk bil-politiki kontra l-imġiba tal-mibegħda li ma tħallix kontenut li jneżża' mid-dinjità, jimmalafama, iħeġġeġ il-vjolenza jew iħeġġeġ id-diskriminazzjoni minħabba r-razza, il-lewn tal-ġilda, il-kasta, l-etniċità, il-pajjiż tat-twelid, ir-reliġjon, ix-xaqlib sesswali, l-identità tal-ġens, id-diżabbiltà, l-istatus ta' persuna li serva għal-tul ta' żmien fil-forzi armati, l-istatus tal-immigrazzjoni, l-istatus soċjo-ekonomiku, l-età, il-piż u t-tqala.

• Ħidma mal-forzi tal-ordni u mas-soċjetà ċivili. Snap taħdem mal-forzi tal-ordni, mal-aġenziji tal-gvern, mal-għaqdiet mingħajr skop ta' qligħ u mal-akkademiċi madwar id-dinja biex tifhem ix-xejriet li jkunu qed jinbtu, biex tqis il-pariri tagħhom hi u tfassal jew tibdel il-politiki tagħha u għall-proċessi tal-għarbiel tal-kontenut u biex iġġib 'il quddiem is-sigurtà fuq il-pjattaforma tagħha.