Merħba fil-Politika tal-Privatezza Supplementari ta' Snap Inc. għal Spectacles 2024. Ħloqna din il-politika biex nipprovdu informazzjoni addizzjonali għal individwi li qed jużaw l-apparat Spectacles 2024 u l-App ta' Spectacles li takkumpanjah (imsejħin flimkien "Spectacles"). Din il-politika tissupplimenta u żżid mal-Politika tal-Privatezza tagħna u mal-avviżi speċifiċi għar-reġjuni u tispjega kif Snap tiġbor, tuża u taqsam id-dejta tiegħek fuq Spectacles.

Billi rridu li jkollok kontroll fuq l-informazzjoni tiegħek, se nagħtuk firxa ta' għodod, fosthom:

• Permess dwar il-Post. Informazzjoni dwar il-post tiegħek (il-post preċiż permezz ta' metodi bħal sinjali tal-GPS) mhix se tinġabar b'mod awtomatiku sakemm int ma tattivax din il-funzjoni fl-App ta' Spectacles. Int dejjem tista' tiddiżattiva din il-funzjoni fi kwalunkwe ħin fl-App ta' Spectacles tiegħek.

• Kamera u Mikrofonu. Meta tikkonettja l-apparat Spectacles tiegħek mal-App ta' Spectacles tiegħek, biex jitħaddem ikun meħtieġ aċċess għall-Kamera u għall-Mikrofonu fuq l-apparat Spectacles tiegħek. Tista' tneħħi l-aċċess tal-App ta' Spectacles għall-Kamera u għall-Mikrofonu fuq l-apparat Spectacles tiegħek billi twaqqaf l-użu tal-apparat Spectacles tiegħek.

• Ħassar l-Immaġnijiet u l-Vidjows li Ġbidt. Immaġnijiet jew reġistrazzjonijiet bil-vidjow li tiġbed fuq l-apparat Spectacles tiegħek jitħassru b'mod awtomatiku mill-apparat tiegħek meta tniżżel l-Immaġnijiet u l-Vidjows li Ġbidt billi tuża l-App ta' Spectacles.

Meta tuża Spectacles, aħna niġbru informazzjoni li tipprovdilna int, informazzjoni li niġġeneraw aħna meta int tuża Spectacles jew informazzjoni oħra li aħna nirċievu bil-permess tiegħek, inkluża:

• Informazzjoni dwar il-kamera u l-awdjo. Biex nipprovdulek l-esperjenza ta' Spectacles, se jkollna bżonn niġbru informazzjoni mill-kamera u mill-mikrofonu tiegħek.

  • Informazzjoni dwar idejk. Biex tinnaviga fuq Spectacles, se jkollok bżonn tuża idejk. Pereżempju, taċċessa l-menù fil-lenti billi tħares lejn il-pala ta' idek u toqros, tmexxi u tiġbed oġġetti tal-AR f'esperjenza ta' lenti bis-swaba' ta' idejk. Dan ma jkunx possibbli bla ma niġbru informazzjoni relatata ma' idejk. Aħna nħarsu lejn kemm huma kbar idejk, inkluża d-distanza stmata bejn l-għekiesi tas-swaba' tiegħek, il-pożizzjoni, u ċ-ċaqliq ta' idejk biex inrendu idejn animati tal-AR u nippożizzjonaw l-oġġetti fuq il-bażi tal-pożizzjoni u tal-moviment ta' idejk.

  • Informazzjoni dwar leħnek. Biex tikkomunika ma' funzjonijiet fuq Spectacles — bħal MyAI — int se tuża kmandi b'leħnek li jfisser li se nipproċessaw l-awdjo tiegħek biex noħolqu transunti testwali. Il-mikrofonu jista' jaqbad ukoll ħsejjes ta' madwarek int u tuża Spectacles.

  • Informazzjoni dwar dak ta' madwarek: Aħna niġbru informazzjoni dwar il-post fiżiku li tkun tinsab fih. Pereżempju, jaf nagħrfu oġġetti fl-ambjent tiegħek bħal ħitan, twieqi u għamara u nistmaw id-daqs, il-forma u d-distanza ta' dawk l-oġġetti. Din l-informazzjoni tgħinna nipprovdulek esperjenza tal-AR li toħloq sens ta' immersjoni.

• Aġġustamenti tal-Kumdità tal-Ilbies. Biex naraw li Spectacles ikunu adattati għalik, aħna niġbru informazzjoni relatata mal-kumdità tal-ilbies u mal-preferenzi:

  • Id-distanza bejn l-għajnejn. Se niġbru informazzjoni dwar id-distanza bejn għajnejk. Din se tgħin fil-kumdità, fiċ-ċarezza viżiva, u permezz ta' esperjenza tal-AR aħjar għalik. Int tista' jew tipprovdi din l-informazzjoni lilna int stess permezz tal-App ta' Spectacles jew aħna nistmaw u niġbruha għalik permezz tal-Kamera meta tuża Spectacles għall-ewwel darba. L-informazzjoni dwar id-distanza bejn l-għajnejn se tippersisti fuq l-apparat Spectacles tiegħek. Tista' tbiddel l-aġġustament għall-kumdità tal-ilbies tiegħek fi kwalunkwe ħin fl-App ta' Spectacles.

  • Meta nużaw l-App ta' iOS ta' Spectacles biex nistmaw id-distanza bejn għajnejk, aħna nużaw il-kamera TrueDepth fuq il-mowbajl tiegħek biex niġbru dejta preċiża tal-wiċċ b'rabta mad-distanza bejn l-għajnejn. Madankollu, kun af li din l-informazzjoni tintuża f'ħin reali — aħna ma naħżnux din l-informazzjoni fuq is-servers tagħna jew naqsmuha ma' partijiet terzi.

• Informazzjoni dwar il-Post. Li jkollok il-post tiegħek attivata jippermettilek iżżid Lentijiet, stikers, u filtri speċifiċi għall-post, u tissejvja din l-informazzjoni mar-ritratti jew mal-vidjows li tiġbed.

• Ritratti u vidjows miġbuda. Tista' tagħżel li tieħu ritratti jew tirreġistra vidjows bi Spectacles. Il-kontenut li tiġbed jibqa' fuq l-apparat tiegħek sakemm tniżżlu billi tuża l-App ta' Spectacles.

Kif deskritt fil-Politika tal-Privatezza tagħna, nużaw l-informazzjoni tiegħek għal diversi skopijiet oħrajn apparti t-tħaddim, il-konsenja u l-manutenzjoni ta' Spectacles. Pereżempju, nużaw l-informazzjoni tiegħek biex:

• Nippersonalizzaw Spectacles tiegħek, billi nużaw l-informazzjoni tiegħek bħall-aġġustamenti għall-kumdità tal-ilbies.

• Niżviluppaw u ntejbu l-mudelli tat-tagħlim awtomatiku tagħna għar-realtà awmentata.

• Nanalizzaw l-informazzjoni tiegħek, bħall-interazzjonijiet u l-metadejta mal-lentijiet biex nidentifikaw xejriet u tendenzi fl-użu, li jgħinuna nifhmu d-domanda.

Kif deskritt fil-Politika tal-Privatezza tagħna, aħna naqsmu informazzjoni dwarek ma' oħrajn għal diversi raġunijiet. Pereżempju, Colocated Lenses jistgħu jaqsmu l-isem muri tiegħek, informazzjoni dwar l-apparat, Bitmoji, ċertu dejta dwar il-kamera, u azzjonijiet li int tieħu ma' parteċipanti oħra fil-Colocated Lens. Nistgħu naqsmu wkoll l-informazzjoni tiegħek ma' fornituri ta' servizzi, inklużi l-iżviluppaturi tal-Lenti tagħna.

Jekk tagħżel li tuża My AI fuq Spectacles, nistgħu naqsmu informazzjoni, skont kif tordna int, ma' fornituri terzi oħra — bħal YouTube permezz tal-użu tas-servizz tal-API tagħhom — biex nipprovdulek riżultati tat-tiftix jew tweġibiet aħjar għall-mistoqsijiet li jista' jkun li tagħmel fuq My AI. Jekk jogħġbok, ħu l-ħin biex taqra l-Politika tal-Privatezza ta' Google biex issir taf kif jipproċessaw it-tagħrif personali tiegħek.

Jekk għandek xi mistoqsija dwar din il-Politika jew il-prattiki tal-privatezza tagħna, tista' tikkuntattjana hawn.