Snapchat ನಲ್ಲಿ ಆನ್‌ಲೈನ್ ಸುರಕ್ಷತೆ

Snapchat ನಲ್ಲಿ ನಾವು ಸೃಜನಶೀಲತೆ ಮತ್ತು ಅಭಿವ್ಯಕ್ತಿಗಾಗಿ ಸುರಕ್ಷಿತ, ವಿನೋದಮಯ ವಾತಾವರಣವನ್ನು ಒದಗಿಸಲು ಶ್ರಮಿಸುತ್ತೇವೆ. ನಮ್ಮ ವೇದಿಕೆಯಾದ್ಯಂತ, ನಮ್ಮ ಸಮುದಾಯದ ಗೌಪ್ಯತೆಯ ಹಿತಾಸಕ್ತಿಗಳನ್ನು ಗೌರವಿಸುವುದರೊಂದಿಗೆ ಸುರಕ್ಷತೆಯನ್ನು ಸುಧಾರಿಸಲು ನಾವು ಬದ್ಧರಾಗಿದ್ದೇವೆ. ಈ ಕೆಳಗಿನವುಗಳ ಕುರಿತಾಗಿ ಹೆಚ್ಚಿನ ಮಾಹಿತಿಗಾಗಿ ದಯವಿಟ್ಟು ನಮ್ಮ ಸುರಕ್ಷತಾ ಕೇಂದ್ರಕ್ಕೆ ಭೇಟಿ ನೀಡಿ:

• ನಮ್ಮ ಸೇವೆಯ ನಿಯಮಗಳು, ಕಮ್ಯುನಿಟಿ ಮಾರ್ಗಸೂಚಿಗಳು ಮತ್ತು ಗೌಪ್ಯತೆ ನೀತಿ ಸೇರಿದಂತೆ ನಮ್ಮ ಸುರಕ್ಷತೆ ಮತ್ತು ಗೌಪ್ಯತೆ ನೀತಿಗಳು, 

• Snapchat ನಲ್ಲಿ ಆ್ಯಪ್ ಒಳಗೆ ಅಥವಾ ವೆಬ್‌ನಲ್ಲಿ ನಮ್ಮ Snapchat ಬೆಂಬಲ ಸೈಟ್ ಮೂಲಕ ಒಂದು ಸುರಕ್ಷತಾ ಕಳವಳವನ್ನು ವರದಿ ಮಾಡುವುದು ಹೇಗೆ, 

• ಕಮ್ಯುನಿಟಿ ಮಾರ್ಗಸೂಚಿಗಳ ಉಲ್ಲಂಘನೆಗಳಿಗಾಗಿ ಸೂಕ್ತ ದಂಡನೆಗಳನ್ನು ನಾವು ಹೇಗೆ ನಿರ್ಧರಿಸುತ್ತೇವೆ ಹಾಗೂ Snapchat ನಲ್ಲಿ ಸಂಬಂಧಿಸಿದ ಖಾತೆ ಅಥವಾ ಕಂಟೆಂಟ್‌ ಕುರಿತ ನಮ್ಮ ನಿರ್ಧಾರದ ವಿರುದ್ಧ ಹೇಗೆ ಮೇಲ್ಮನವಿ ಸಲ್ಲಿಸಬಹುದು ಎಂಬುದು ಸೇರಿದಂತೆ, ಮಾಡರೇಷನ್, ಜಾರಿಗೊಳಿಸುವಿಕೆ ಮತ್ತು ಮೇಲ್ಮನವಿಗಳಿಗೆ ನಮ್ಮ ವಿಧಾನ,

• ಸಲಹೆ ಮತ್ತು ಬೆಂಬಲವನ್ನು ಪಡೆಯಲು ಭಾರತೀಯ ಮತ್ತು ಜಾಗತಿಕ ಬಳಕೆದಾರರಿಗೆ ಲಭ್ಯವಿರುವ ಇತರ ಸುರಕ್ಷತಾ ಸಂಪನ್ಮೂಲಗಳು. 

Snap ನ ಸುರಕ್ಷತಾ ನೀತಿಗಳು ಮತ್ತು ಅಭ್ಯಾಸಗಳ ಕುರಿತು ನೀವು ಹೊಂದಿರಬಹುದಾದ ಯಾವುದೇ ಪ್ರಶ್ನೆಗಳು, ಕಳವಳಗಳು ಅಥವಾ ದೂರುಗಳೊಂದಿಗೆ ನೀವು ಯಾವಾಗಲೂ ನಮ್ಮನ್ನು ಇಲ್ಲಿ ಸಂಪರ್ಕಿಸಬಹುದು. 

ನಿಷೇಧಿತ ವಿಷಯ

ಎಲ್ಲಾ Snapchatter ಗಳು ನಮ್ಮ ಕಮ್ಯುನಿಟಿ ಮಾರ್ಗಸೂಚಿಗಳನ್ನು ಒಳಗೊಂಡಂತೆ ನಮ್ಮ ಸೇವೆಯ ನಿಯಮಗಳನ್ನು ಪಾಲಿಸಬೇಕು. ಈ ನಿಯಮಗಳು Snapchat ನಲ್ಲಿನ ಎಲ್ಲ ವಿಷಯ ಮತ್ತು ನಡವಳಿಕೆಗೆ — ಹಾಗೂ ಎಲ್ಲ Snapchatter ಗಳಿಗೆ ಅನ್ವಯಿಸುತ್ತವೆ.  ನಿಮ್ಮ ನ್ಯಾಯಾಧಿಕಾರ ವ್ಯಾಪ್ತಿಯಲ್ಲಿ ಕಾನೂನುಬಾಹಿರವಾಗಿರುವ ವಿಷಯವನ್ನು ಕಳುಹಿಸಲು ಅಥವಾ ಪೋಸ್ಟ್ ಮಾಡಲು ಅಥವಾ ಯಾವುದೇ ಕಾನೂನುಬಾಹಿರ ಚಟುವಟಿಕೆಗೆ Snapchat ಬಳಸುವುದನ್ನು ಅವು ನಿಷೇಧಿಸುತ್ತವೆ. ಭಾರತದಲ್ಲಿ, ಮಾಹಿತಿ ತಂತ್ರಜ್ಞಾನ (ಮಧ್ಯವರ್ತಿ ಮಾರ್ಗಸೂಚಿಗಳು ಮತ್ತು ಡಿಜಿಟಲ್ ಮಾಧ್ಯಮ ನೀತಿ ಸಂಹಿತೆ) ನಿಯಮಗಳು, 2021 ರ ನಿಯಮ 3 ರ ಪ್ರಕಾರ ನಾವು ನಿಷೇಧಿತ ವಿಷಯದ ಕೆಲವು ವರ್ಗಗಳ ಕುರಿತು ನಿಮಗೆ ತಿಳಿಸಬೇಕಾಗುತ್ತದೆ. ಅಗತ್ಯಗಳ ಪೂರ್ಣ ಪಠ್ಯಕ್ಕಾಗಿ ದಯವಿಟ್ಟು ಈ ಹೈಪರ್‌ಲಿಂಕ್ ಅನ್ನು ಗಮನಿಸಿ.

Snapchat ನಲ್ಲಿ ನಿಷೇಧಿಸಲಾಗಿರುವ ವಿಷಯಗಳಲ್ಲಿ ಇವು ಒಳಗೊಂಡಿದೆ:

• ಮಕ್ಕಳ ಲೈಂಗಿಕ ಶೋಷಣೆ ಮತ್ತು ದೌರ್ಜನ್ಯದ ಚಿತ್ರಣ (CSEAI); ವಯಸ್ಕರ ಅಶ್ಲೀಲ ಕಾಮಕೇಳಿಯ ವಿಷಯ; ಮತ್ತು ಮಕ್ಕಳಿಗೆ (ಅಂದರೆ, 18 ವರ್ಷಕ್ಕಿಂತ ಕಡಿಮೆ ವಯಸ್ಸಿನವರು) ಹಾನಿಕಾರಕವಾದ ಇತರ ವಿಷಯ ಸೇರಿದಂತೆ ಲೈಂಗಿಕ ವಿಷಯ

• ಲಿಂಗ, ಜನಾಂಗ, ಕುಲ, ಮತ ಅಥವಾ ಜಾತಿಗೆ ಸಂಬಂಧಿಸಿರುವುದು ಸೇರಿದಂತೆ, ದ್ವೇಷಮಯ, ತಾರತಮ್ಯದ, ಭಯೋತ್ಪಾದಕ ಮತ್ತು ತೀವ್ರವಾದದ ವಿಷಯ

• ಕಿರುಕುಳ, ಬೆದರಿಸುವಿಕೆ ಮತ್ತು ಗೌಪ್ಯತೆಯ ಅತಿಕ್ರಮಣ

• ಸುಳ್ಳುಮಾಹಿತಿ, ಸುಳ್ಳು ಸುದ್ದಿ ಮತ್ತು "ಡೀಪ್‌ಫೇಕ್‌ಗಳು" ಸೇರಿದಂತೆ ಹಾನಿಕಾರಕ ಸುಳ್ಳು ಅಥವಾ ವಂಚನೆಯ ಮಾಹಿತಿ 

• ಅಪರಾಧ ಚಟುವಟಿಕೆಗಳು, ನಿಯಂತ್ರಿತ ಸರಕುಗಳು ಅಥವಾ ಉದ್ಯಮಗಳ (ಉದಾಹರಣೆಗೆ ಜೂಜು) ಕಾನೂನುಬಾಹಿರ ಪ್ರಚಾರ ಮತ್ತು ಅಕ್ರಮ ಹಣ ವರ್ಗಾವಣೆ ಸೇರಿದಂತೆ ಕಾನೂನುಬಾಹಿರ ಮತ್ತು ನಿಯಂತ್ರಿತ ಚಟುವಟಿಕೆಗಳು 

• ಗುರುತು ಕಳವು, ಸೋಗುಹಾಕುವಿಕೆ ಮತ್ತು ಬೌದ್ಧಿಕ ಆಸ್ತಿ ಹಕ್ಕುಗಳ ಉಲ್ಲಂಘನೆ ಸೇರಿದಂತೆ ವಂಚನೆಯ ನಡವಳಿಕೆ 

• ಯಾವುದೇ ಕಂಪ್ಯೂಟರ್ ಸಂಪನ್ಮೂಲದ ಕಾರ್ಯವನ್ನು ಅಡ್ಡಿಪಡಿಸಲು, ನಾಶಮಾಡಲು ಅಥವಾ ಮಿತಿಗೊಳಿಸಲು ವಿನ್ಯಾಸಗೊಳಿಸಲಾದ ಸ್ಪ್ಯಾಮ್ ಮತ್ತು ದುರುದ್ದೇಶಪೂರಿತ ಸಾಫ್ಟ್‌ವೇರ್ (ಮಾಲ್‌ವೇರ್) ಅಥವಾ ಇತರ ಯಾವುದೇ ಕಂಪ್ಯೂಟರ್ ಕೋಡ್, ಫೈಲ್ ಅಥವಾ ಪ್ರೊಗ್ರಾಂ‌ನ ವಿತರಣೆ.

• ಭಾರತದ ಏಕತೆ, ಸಮಗ್ರತೆ, ರಕ್ಷಣೆ, ಭದ್ರತೆ ಅಥವಾ ಸಾರ್ವಭೌಮತ್ವ, ವಿದೇಶಗಳ ಜೊತೆಗಿನ ಸ್ನೇಹಪರ ಸಂಬಂಧಗಳು ಅಥವಾ ಸಾರ್ವಜನಿಕ ಸುವ್ಯವಸ್ಥೆಗೆ ಬೆದರಿಕೆ ಹಾಕುತ್ತದೆ, ಅಥವಾ ಯಾವುದೇ ದಸ್ತಗಿರಿ ಮಾಡಬಹುದಾದ ಅಪರಾಧಕ್ಕೆ ಪ್ರೇರೇಪಿಸುತ್ತದೆ ಅಥವಾ ಯಾವುದೇ ಅಪರಾಧದ ತನಿಖೆಗೆ ತಡೆಯುತ್ತದೆ ಅಥವಾ ಬೇರೆ ಯಾವುದೇ ರಾಷ್ಟ್ರವನ್ನು ಅವಮಾನಿಸುತ್ತದೆ.

• ಸದ್ಯಕ್ಕೆ ಜಾರಿಯಲ್ಲಿರುವ ಯಾವುದೇ ಕಾನೂನನ್ನು ಉಲ್ಲಂಘಿಸುತ್ತದೆ.

ಅನ್ವಯಿಸುವ ಕಾನೂನುಗಳನ್ನು ಉಲ್ಲಂಘಿಸುವ ಯಾವುದೇ ಕೃತಕವಾಗಿ ಸೃಷ್ಟಿಸಲಾದ ಮಾಹಿತಿಯನ್ನು (ಮಾಹಿತಿ ತಂತ್ರಜ್ಞಾನ ಕಾಯ್ದೆ, 2000, ಭಾರತೀಯ ನ್ಯಾಯ ಸಂಹಿತೆ, 2023, ಲೈಂಗಿಕ ಅಪರಾಧಗಳಿಂದ ಮಕ್ಕಳನ್ನು ರಕ್ಷಿಸುವ ಕಾಯ್ದೆ, 2012 ಮತ್ತು ಸ್ಫೋಟಕ ಪದಾರ್ಥಗಳ ಕಾಯ್ದೆ 1908 ಸೇರಿದಂತೆ, ಆದರೆ ಇಷ್ಟಕ್ಕೆ ಸೀಮಿತವಲ್ಲದಂತೆ) ರಚಿಸಲು, ಮಾರ್ಪಡಿಸಲು, ಪ್ರಕಟಿಸಲು ಅಥವಾ ಹಂಚಿಕೊಳ್ಳಲು ನೀವು ನಮ್ಮ ಸೇವೆಗಳನ್ನು ಬಳಸಬಾರದು ಎಂಬುದನ್ನು ಕೂಡ ಭಾರತೀಯ ಕಾನೂನುಗಳ ಅಡಿಯಲ್ಲಿ ನಾವು ನಿಮಗೆ ತಿಳಿಸಬೇಕಾಗುತ್ತದೆ. ಇದು ಈ ಕೆಳಗಿನವುಗಳನ್ನು ಒಳಗೊಂಡ ಕೃತಕವಾಗಿ ಸೃಷ್ಟಿಸಲಾದ ಮಾಹಿತಿಯನ್ನು ಸೃಷ್ಟಿಸುವುದು ಅಥವಾ ವಿತರಿಸುವುದನ್ನು ಒಳಗೊಂಡಿದೆ:

(i) ಮಕ್ಕಳ ಲೈಂಗಿಕ ಶೋಷಣೆ ಮತ್ತು ದೌರ್ಜನ್ಯದ ಸಾಮಗ್ರಿಗಳು, ಒಪ್ಪಿಗೆಯಿಲ್ಲದ ಖಾಸಗಿ ಚಿತ್ರಣದ ವಿಷಯ ಅಥವಾ ದೈಹಿಕ ಗೌಪ್ಯತೆ, ಅಸಭ್ಯ, ಅನುಚಿತ, ಅಥವಾ ಲೈಂಗಿಕವಾಗಿ ಸುಸ್ಪಷ್ಟವಾಗಿರುವುದು ಸೇರಿದಂತೆ, ಅಶ್ಲೀಲ, ಕಾಮಕೇಳಿ, ಶಿಶುಕಾಮ, ಇನ್ನೊಬ್ಬ ವ್ಯಕ್ತಿಯ ಗೌಪ್ಯತೆಯನ್ನು ಅತಿಕ್ರಮಿಸುವ ವಿಷಯವನ್ನು ಒಳಗೊಂಡಿರುವುದು;

(ii) ಸುಳ್ಳು ದಸ್ತಾವೇಜುಗಳು ಅಥವಾ ಸುಳ್ಳು ಎಲೆಕ್ಟ್ರಾನಿಕ್ ದಾಖಲೆಗಳ ರಚನೆ, ಸೃಷ್ಟಿ, ಮಾರ್ಪಾಡು ಅಥವಾ ತಿರುಚುವಿಕೆಗೆ ಕಾರಣವಾಗುವುದು;

(iii) ಸ್ಫೋಟಕ ಸಾಮಗ್ರಿ, ಶಸ್ತ್ರಾಸ್ತ್ರಗಳು ಅಥವಾ ಮದ್ದುಗುಂಡುಗಳ ತಯಾರಿಕೆ, ಅಭಿವೃದ್ಧಿ ಅಥವಾ ಸಂಗ್ರಹಣೆಗೆ ಸಂಬಂಧಿಸಿರುವುದು; ಅಥವಾ

(iv) ನೈಜ ವ್ಯಕ್ತಿಯ ಒಳಗೊಳ್ಳುವಿಕೆಯೊಂದಿಗೆ ಅಥವಾ ಇಲ್ಲದೆ, ಆ ವ್ಯಕ್ತಿಯ ಗುರುತು, ಧ್ವನಿ, ನಡವಳಿಕೆ, ಕ್ರಿಯೆ, ಹೇಳಿಕೆ ಅಥವಾ ಅಂತಹ ಘಟನೆ ನಡೆದಿದೆ ಎಂದು ತಪ್ಪಾಗಿ ನಿರೂಪಿಸುವ ಮೂಲಕ ನೈಜ ವ್ಯಕ್ತಿಯನ್ನು ಅಥವಾ ನೈಜ-ಪ್ರಪಂಚದ ಘಟನೆಯನ್ನು ಸುಳ್ಳಾಗಿ ಬಿಂಬಿಸುವುದು ಅಥವಾ ವ್ಯಕ್ತಪಡಿಸುವುದು.

ಹೆಚ್ಚಿನ ಮಾಹಿತಿಗಾಗಿ ದಯವಿಟ್ಟು ನಮ್ಮ ಸೇವೆಯ ನಿಯಮಗಳು ಮತ್ತು ಕಮ್ಯುನಿಟಿ ಮಾರ್ಗಸೂಚಿಗಳನ್ನು ಪರಿಶೀಲಿಸಿ.

ನಿಷೇಧಿತ ವಿಷಯ ಹಂಚಿಕೊಳ್ಳುವುದರ ಪರಿಣಾಮಗಳು 

ಮೇಲೆ ವಿವರಿಸಿದ ವಿಷಯವನ್ನು ಹಂಚಿಕೊಳ್ಳುವುದು Snap ನ ಕಮ್ಯುನಿಟಿ ಮಾರ್ಗಸೂಚಿಗಳು ಮತ್ತು ಸೇವೆಯ ನಿಯಮಗಳು ಹಾಗೂ ಭಾರತೀಯ ನ್ಯಾಯ ಸಂಹಿತೆ, 2023, IT ಕಾಯ್ದೆ 2000, ಗ್ರಾಹಕ ಸಂರಕ್ಷಣಾ ಕಾಯ್ದೆ, ಬಾಲಪರಾಧಿ ನ್ಯಾಯ ಕಾಯ್ದೆ ಮತ್ತು ಇತರ ಸಂಬಂಧಿತ ಕಾನೂನುಗಳಂತಹ ಭಾರತೀಯ ಕಾನೂನುಗಳನ್ನು ಉಲ್ಲಂಘಿಸಬಹುದು. ಸೇವೆಯ ನಿಯಮಗಳು ಮತ್ತು ಕಮ್ಯುನಿಟಿ ಮಾರ್ಗಸೂಚಿಗಳಲ್ಲಿ ಸೂಚಿಸಿರುವಂತೆ, ಕಾನೂನಿನ ಉಲ್ಲಂಘನೆಗಳು ಇತರ ಪರಿಣಾಮಗಳ ಜೊತೆಗೆ ವಿಷಯವನ್ನು ತೆಗೆದುಹಾಕಲು; ಎಚ್ಚರಿಕೆ ನೀಡಲು; ಖಾತೆಯನ್ನು ಅಮಾನತುಗೊಳಿಸಲು ಅಥವಾ ಮುಕ್ತಾಯಗೊಳಿಸಲು; ಕಾನೂನು ಜಾರಿ ಸಂಸ್ಥೆಗೆ ಉಲ್ಲೇಖಿಸಲು ಮತ್ತು/ಅಥವಾ ನಿಮ್ಮ ಗುರುತನ್ನು ಬಹಿರಂಗಪಡಿಸಲು (ಅಗತ್ಯವಿರುವಲ್ಲಿ ಅನ್ವಯಿಸುವ ಕಾನೂನುಗಳ ಅಡಿಯಲ್ಲಿ) ಕಾರಣವಾಗಬಹುದು.

ಭಾರತ ಮಾಸಿಕ ಪಾರದರ್ಶಕತೆಯ ವರದಿಗಳು

ಪ್ರತಿ ತಿಂಗಳು, ಮಾಸಿಕ ವರದಿ ಮಾಡುವಿಕೆ ಮತ್ತು ಕ್ರಮ ಜಾರಿಗೊಳಿಸುವಿಕೆ ವಿಷಯವನ್ನು ಒಳಗೊಂಡ ಭಾರತಕ್ಕಾಗಿನ ಪಾರದರ್ಶಕತೆಯ ವರದಿಯನ್ನು ನಾವು ಪ್ರಕಟಿಸುತ್ತೇವೆ, ಅದನ್ನು ನಂತರ ನಮ್ಮ ಅರ್ಧವಾರ್ಷಿಕ ಪಾರದರ್ಶಕತೆಯ ವರದಿಯಲ್ಲಿ ಸೇರಿಸಲಾಗುತ್ತದೆ.