ഓസ്‌ട്രേലിയയുടെ സോഷ്യൽ മീഡിയ കുറഞ്ഞ പ്രായപരിധി (SMMA) നിയമം നടപ്പിലാക്കി രണ്ട് മാസം പിന്നിടുമ്പോൾ, ഈ നിയമം പാലിക്കുന്നതിലും യുവ ഓസ്‌ട്രേലിയക്കാരുടെ ഓൺലൈൻ സുരക്ഷ മെച്ചപ്പെടുത്തുക എന്ന ഇതിന്റെ അടിസ്ഥാന ലക്ഷ്യത്തെ പിന്തുണയ്ക്കുന്നതിലും Snapchat പൂർണ്ണമായും പ്രതിജ്ഞാബദ്ധമായി നിലകൊള്ളുന്നു. ഈ മാറ്റങ്ങൾനടപ്പിലാക്കാൻ ശ്രമിച്ചപ്പോൾ, നിലവിലുള്ള രൂപത്തിൽ ഈ നിയമത്തിനുള്ള പോരായ്മകളെക്കുറിച്ചും പരിമിതികളെക്കുറിച്ചും പ്രധാനപ്പെട്ട ഉൾക്കാഴ്ചകൾ ഞങ്ങൾക്ക് ലഭിച്ചിട്ടുണ്ട്. ഞങ്ങളുടെ നിയമപാലന നടപടികളുടെ നിലവിലെ അവസ്ഥയും, യുവാക്കളുടെ ഓൺലൈൻ സുരക്ഷ വർദ്ധിപ്പിക്കുന്നതിന് ഇനിയെന്തൊക്കെ മാറ്റങ്ങളാണ് ഉണ്ടാവേണ്ടതെന്ന ഞങ്ങളുടെ കാഴ്ചപ്പാടും പങ്കുവെക്കാൻ ഞങ്ങൾ ആഗ്രഹിക്കുന്നു.

SMMA-ന്റെ നിബന്ധനകൾ പാലിക്കുന്നതിനായി Snapchat സുപ്രധാനമായ നടപടികൾ സ്വീകരിച്ചിട്ടുണ്ട്. 2026 ജനുവരി അവസാനത്തെ കണക്കനുസരിച്ച്, 16 വയസ്സിന് താഴെ പ്രായമാണെന്ന് സ്വയം വെളിപ്പെടുത്തിയതോ അല്ലെങ്കിൽ ഞങ്ങളുടെ പ്രായം തിരിച്ചറിയാനുള്ള സാങ്കേതികവിദ്യ വഴി 16 വയസ്സിന് താഴെയാണെന്ന് ഞങ്ങൾ കരുതുന്നതോ ആയ ഓസ്‌ട്രേലിയയിലെ 4,15,000-ത്തിലധികം Snapchat അക്കൗണ്ടുകൾ ഞങ്ങൾ പൂട്ടുകയോ പ്രവർത്തനരഹിതമാക്കുകയോ ചെയ്തിട്ടുണ്ട്. ഞങ്ങൾ ഓരോ ദിവസവും കൂടുതൽ അക്കൗണ്ടുകൾ ലോക്ക് ചെയ്തുകൊണ്ടിരിക്കുകയാണ്.

എങ്കിലും നിയമം നടപ്പിലാക്കുന്നതിലെ നിലവിലെ രീതിയിൽ ഇതിന്റെ ലക്ഷ്യങ്ങളെ തടസ്സപ്പെടുത്തുന്ന തരത്തിലുള്ള ഗണ്യമായ വിടവുകൾ ഇപ്പോഴും ഉണ്ടെന്ന് ഞങ്ങൾ കരുതുന്നു.

ഒന്നാമതായി, കൃത്യവും വിശ്വസനീയവുമായ പ്രായപരിശോധനയ്ക്ക് നിലവിൽ യഥാർത്ഥ സാങ്കേതിക പരിമിതികളുണ്ട്. 2025-ൽ പ്രസിദ്ധീകരിച്ച ഓസ്‌ട്രേലിയൻ സർക്കാരിന്റെ തന്നെ സ്വന്തം പഠന റിപ്പോർട്ട് പ്രകാരം, ലഭ്യമായ പ്രായം കണക്കാക്കുന്ന സാങ്കേതികവിദ്യകൾക്ക് ശരാശരി 2-3 വർഷത്തെ വ്യത്യാസത്തിൽ മാത്രമേ കൃത്യത ഉറപ്പാക്കാൻ കഴിയുന്നുള്ളൂ എന്ന് കണ്ടെത്തി. പ്രായോഗികമായി, ഇതിനർത്ഥം 16 വയസ്സിന് താഴെയുള്ള ചിലർക്ക് സുരക്ഷാ സംവിധാനങ്ങളെ മറികടക്കാൻ കഴിഞ്ഞേക്കാം എന്നും, അങ്ങനെ അവർക്ക് ലഭിക്കേണ്ട സംരക്ഷണം ഇല്ലാതാകുകയും, അതേസമയം 16 വയസ്സിന് മുകളിലുള്ളവർക്ക് തെറ്റായ രീതിയിൽ പ്രവേശനം നിഷേധിക്കപ്പെടാൻ സാധ്യതയുണ്ട് എന്നുമാണ്.

രണ്ടാമതായി, നിലവിലെ രീതിയിൽ മേഖലയിലുടനീളം സംരക്ഷണത്തിന്റെ കുറവുണ്ട്, അതിലൂടെ ഈ നിയമത്തിന്റെ പരിധിയിൽ വരാത്തതോ അല്ലെങ്കിൽ നിയമസാധുത വ്യക്തമല്ലാത്തതോ ആയ നൂറുകണക്കിന് മറ്റ് ആപ്പുകളിൽ ഇത് സുരക്ഷാ പഴുതുകൾ നിലനിർത്തുന്നു. നിയന്ത്രണങ്ങളുള്ള സേവനങ്ങളിലേക്കുള്ള പ്രവേശനം നഷ്ടപ്പെടുമ്പോൾ യുവജനങ്ങൾ ആശയവിനിമയം നടത്തുന്നത് നിർത്തുകയില്ല. ഓസ്‌ട്രേലിയയിൽ Snapchat ഉപയോഗിക്കുന്ന സമയത്തിന്റെ 75 ശതമാനത്തിലധികം അടുത്ത സുഹൃത്തുക്കളുമായും കുടുംബാംഗങ്ങളുമായും സന്ദേശങ്ങൾ കൈമാറുന്നതിനാണ് ചെലവഴിക്കുന്നത്. ഈ ആശയവിനിമയ ഉപാധികൾ ഉപയോഗിക്കുന്നതിൽ നിന്നും യുവാക്കൾ തടയപ്പെടുമ്പോൾ, അവർ നിയമപരമായ നിയന്ത്രണങ്ങൾ ഇല്ലാത്ത മറ്റ് ബദൽ സന്ദേശ കൈമാറ്റ സേവനങ്ങളെ ആശ്രയിച്ചേക്കാം എന്നതിൽ ഞങ്ങൾ ആശങ്കാകുലരാണ് — ഇത്തരം സേവനങ്ങൾ അധികം അറിയപ്പെടാത്തവയും Snapchat നൽകുന്ന സുരക്ഷാ സംവിധാനങ്ങളേക്കാൾ വളരെ കുറഞ്ഞ സുരക്ഷ മാത്രം ഉറപ്പുനൽകുന്നവയും ആയിരിക്കാം. ഈ മാറ്റത്തെ അളക്കുന്നതിന് ആവശ്യമായ സ്ഥിതിവിവരക്കണക്കുകൾ നിലവിൽ ലഭ്യമല്ലെങ്കിലും നിയമം വിഭാവനം ചെയ്ത ഫലങ്ങൾ കൈവരിക്കുന്നുണ്ടോ എന്ന് നയരൂപകർത്താക്കൾ വിലയിരുത്തുമ്പോൾ ഗൗരവകരമായി പരിഗണിക്കേണ്ട ഒരു അപകടസാധ്യതയാണിത്.

അതുകൊണ്ടാണ് SMMA നിയമം നടപ്പിലാക്കുന്നത് ശക്തിപ്പെടുത്തുന്നതിനും, അതുവഴിയുണ്ടാകാൻ സാധ്യതയുള്ള ദോഷകരമായ അപ്രതീക്ഷിത ഫലങ്ങൾ കുറയ്ക്കുന്നതിനുമായി, ഒരു അധിക സുരക്ഷാ മുൻകരുതൽ എന്ന നിലയിൽ അപ്പ് സ്റ്റോർ തലത്തിലുള്ള പ്രായപരിശോധനയ്ക്കായി ഞങ്ങൾ വാദിച്ചുകൊണ്ടിരിക്കുന്നത്.

ആപ്പ് സ്റ്റോർ തലത്തിലുള്ള പ്രായപരിശോധന ഒന്നിലധികം അപകടസാധ്യതകളും പോരായ്മകളും പരിഹരിക്കാൻ സഹായിക്കും. ഒന്നാമതായി, ഇത് ഓരോ ഉപകരണങ്ങൾക്കും നിയമപരിധിയിൽ വരുന്ന ആപ്പുകൾക്ക് കൂടുതൽ ഏകീകൃതമായ പ്രായ സൂചനകൾ നൽകും, ഇത് 16 വയസ്സിന് താഴെയുള്ളവർ ആപ്പ് ഉപയോഗിക്കുന്നത് തടയാൻ സഹായിക്കുന്നതിനോടൊപ്പം, 16 വയസ്സിന് മുകളിലുള്ളവർ തെറ്റായ രീതിയിൽ പുറത്താക്കപ്പെടാനുള്ള സാധ്യത കുറയ്ക്കുകയും ചെയ്യുന്നു. രണ്ടാമതായി, ഇത് തിരഞ്ഞെടുക്കപ്പെട്ട ചില നിയന്ത്രിത ആപ്പുകളിൽ മാത്രം ഒതുങ്ങാതെ — എല്ലാ സേവനങ്ങളിലുടനീളം ഡിജിറ്റൽ ആവാസവ്യവസ്ഥയുടെ സുരക്ഷ മൊത്തത്തിൽ ശക്തമാക്കാൻ സഹായിക്കും. പ്രായം ഉറപ്പുവരുത്തുന്നതിനായി പൊതുവായൊരു സംവിധാനം കൊണ്ടുവരുന്നതിലൂടെ, യുവാക്കൾ ഓൺലൈനിൽ ഏത് സേവനങ്ങൾ ഉപയോഗിച്ചാലും അവർക്ക് അനുയോജ്യമായ സുരക്ഷാ സംവിധാനങ്ങൾ ലഭിക്കുന്നുണ്ടെന്ന് ഉറപ്പാക്കാൻ ആപ്പ് സ്റ്റോർ തലത്തിലുള്ള പരിശോധന സഹായിക്കും.

ഈ സമീപനം ആഗോളതലത്തിൽ സ്വീകരിക്കാവുന്ന മൂല്യവത്തായ ഒരു മാതൃകയായി മാറിയേക്കാം. പ്രായത്തിൻ്റെ അടിസ്ഥാനത്തിലുള്ള സാമൂഹിക മാധ്യമങ്ങളുടെ നിരോധനത്തിന് പകരം, ആപ്പ് സ്റ്റോർ തലത്തിൽ പ്രായം ഉറപ്പാക്കുന്നത് ഡിജിറ്റൽ ആവാസവ്യവസ്ഥയെ മുഴുവനായി യുവ ഉപയോക്താക്കളെ കൂടുതൽ ഏകീകൃതമായി സംരക്ഷിക്കാനും അവർക്ക് പ്രായത്തിന് അനുയോജ്യമായ അനുഭവങ്ങൾ നൽകാനും സഹായിക്കും, അതിനോടൊപ്പം സോഷ്യൽ മീഡിയയുടെ ഗുണഫലങ്ങൾ ആസ്വദിക്കാൻ ഇത് അവർക്ക് അവസരമൊരുക്കുകയും ചെയ്യുന്നു.

ഞങ്ങൾ ഒരു കാര്യം വ്യക്തമാക്കാൻ ആഗ്രഹിക്കുന്നു: 16 വയസ്സിന് താഴെയുള്ളവർക്ക് ഏർപ്പെടുത്തുന്ന സമ്പൂർണ്ണ നിരോധനം ശരിയായ ഒരു സമീപനമാണെന്ന് ഞങ്ങൾ ഇപ്പോഴും വിശ്വസിക്കുന്നില്ല. ഓസ്‌ട്രേലിയൻ സർക്കാരിന്റെ ലക്ഷ്യങ്ങൾ ഞങ്ങൾ മനസ്സിലാക്കുന്നു, യുവാക്കളെ ഓൺലൈനിൽ സംരക്ഷിക്കുക എന്ന ലക്ഷ്യത്തിൽ ഞങ്ങൾ സർക്കാരിനൊപ്പം നിലകൊള്ളുന്നു. എന്നാൽ Snapchat-ന്‍റെ കാര്യത്തിൽ — ഇത് പ്രാഥമികമായി യുവാക്കൾ തങ്ങളുടെ അടുത്ത സുഹൃത്തുക്കളുമായും കുടുംബാംഗങ്ങളുമായും ബന്ധം നിലനിർത്താൻ ഉപയോഗിക്കുന്ന ഒരു സന്ദേശ കൈമാറ്റ ആപ്പാണ് — കൗമാരക്കാരെ ഇത്തരം ബന്ധങ്ങളിൽ നിന്ന് ഒഴിവാക്കുന്നത് അവരെ കൂടുതൽ സന്തോഷവാന്മാരോ അല്ലെങ്കിൽ മറ്റേതെങ്കിലും വിധത്തിൽ മെച്ചപ്പെട്ട നിലയിലുള്ളവരോ ആക്കുമെന്ന് ഞങ്ങൾ വിശ്വസിക്കുന്നില്ല. Snapchat ഈ പ്രായപരിധി നിയമത്തിന്‍റെ പരിധിയിൽ വരുന്ന ഒരു സോഷ്യൽ മീഡിയ പ്ലാറ്റ്‌ഫോമാണ് എന്ന വാദത്തോട് ഞങ്ങൾ അടിസ്ഥാനപരമായി വിയോജിക്കുന്നു.

ഈ നയത്തോടുള്ള ഞങ്ങളുടെ വിയോജിപ്പ് നിലനിൽക്കെത്തന്നെ, ഇത് നടപ്പാക്കുന്നത് മെച്ചപ്പെടുത്തുന്നതിനും ദോഷകരമായ അപ്രതീക്ഷിത ഫലങ്ങൾ കുറയ്ക്കുന്നതിനുമായി ക്രിയാത്മകമായി ഇടപെടേണ്ടതും നിർദ്ദേശങ്ങൾ സമർപ്പിക്കേണ്ടതും പ്രധാനമാണെന്ന് ഞങ്ങൾ വിശ്വസിക്കുന്നു. ഓസ്‌ട്രേലിയ ഈ സമീപനവുമായി മുന്നോട്ടുപോകാനാണ് തീരുമാനിക്കുന്നതെങ്കിൽ, അത് യുവാക്കൾക്ക് കൂടുതൽ സംരക്ഷണം നൽകുന്നതും ദോഷഫലങ്ങൾ കുറഞ്ഞതുമായ രീതിയിലായിരിക്കണം നടപ്പിലാക്കേണ്ടത്. ആപ്പ്-സ്റ്റോർ തലത്തിൽ ഒരു ഏകീകൃത പ്രായപരിശോധനാ സംവിധാനം നിർമ്മിക്കുന്നത് കൂടുതൽ സ്ഥിരതയുള്ള സംരക്ഷണം ഉറപ്പാക്കാനും നിയമം മറികടക്കുന്നത് ശക്തമായി തടയാനും സഹായിക്കും.

ഇതിനിടയിൽ, ഓസ്‌ട്രേലിയയിലും ലോകമെമ്പാടുമുള്ള യുവ Snapchat ഉപയോക്താക്കളുടെ സുരക്ഷ ഉറപ്പാക്കുന്നതിനുള്ള സുരക്ഷാ സംവിധാനങ്ങൾ ഞങ്ങൾ തുടർന്നും വികസിപ്പിക്കുന്നു. വ്യക്തിഗത ആശയവിനിമയത്തിനായി പരസ്പരമുള്ള സുഹൃദ്‌ബന്ധമോ അല്ലെങ്കിൽ കോൺടാക്റ്റ് ബുക്ക് വഴിയുള്ള ബന്ധമോ നിർബന്ധമാക്കുന്ന സുരക്ഷാ മുൻകരുതലുകൾ Snapchat-ൽ ഉണ്ട്, കൂടാതെ, സിഡ്‌നി കേന്ദ്രമാക്കി പ്രവർത്തിക്കുന്ന ഒരു പൂർണ്ണസമയ ടീം ഉൾപ്പെടെ 24/7 പ്രവർത്തിക്കുന്ന ട്രസ്റ്റ് & സേഫ്റ്റി ടീമുകളെയും Snapchat നിലനിർത്തുന്നു.

കുടുംബ കേന്ദ്രം വഴി ഞങ്ങൾ സമഗ്രമായ പാരന്‍റൽ ടൂളുകളും നൽകുന്നുണ്ട്; കൗമാരക്കാരുടെ Snapchat ഉപയോഗത്തെക്കുറിച്ച് മാതാപിതാക്കൾക്ക് കൂടുതൽ ആഴത്തിലുള്ള ധാരണ നൽകുന്ന പുതിയ ഫീച്ചറുകൾ ഉൾപ്പെടുത്തിക്കൊണ്ട് ഞങ്ങൾ ഈയടുത്ത് ഇത് വിപുലീകരിച്ചിട്ടുണ്ട്. തങ്ങളുടെ കൗമാരക്കാരായ മക്കൾ ഓരോ ദിവസവും പ്ലാറ്റ്‌ഫോമിൽ എത്ര സമയം ചെലവഴിക്കുന്നുണ്ടെന്നും അത് ഏതൊക്കെ ഫീച്ചറുകൾക്കായി എങ്ങനെയൊക്കെ ഉപയോഗിക്കുന്നു എന്നും മാതാപിതാക്കൾക്ക് ഇപ്പോൾ കാണാൻ സാധിക്കും — സുഹൃത്തുക്കളുമായുള്ള സംഭാഷണം, ക്യാമറ ഉപയോഗിച്ചുള്ള നിർമ്മാണം, ഉള്ളടക്കങ്ങൾ പരിശോധിക്കൽ തുടങ്ങിയവ. കൗമാരക്കാർ പുതിയ സുഹൃത്തുക്കളെ ചേർക്കുമ്പോൾ, അവർക്ക് പൊതുവായ സുഹൃത്തുക്കൾ ഉണ്ടോ എന്നോ അതോ അവർ കോൺടാക്റ്റ് ബുക്കിൽ ഉള്ളവരാണോ എന്നത് ഉൾപ്പെടെ, തങ്ങളുടെ മക്കൾക്ക് അവരെ എങ്ങനെ അറിയാം എന്ന് കാണാൻ മാതാപിതാക്കൾക്ക് സാധിക്കും. ഈ സ്ഥിതിവിവരക്കണക്കുകൾ മാതാപിതാക്കൾക്ക് അവരുടെ കൗമാരക്കാരായ മക്കളുടെ ഓൺലൈൻ ജീവിതത്തെക്കുറിച്ച് കൂടുതൽ അറിവോടെയുള്ള സംഭാഷണങ്ങൾ നടത്താനും, അവർ യഥാർത്ഥ ജീവിതത്തിൽ പരിചയമുള്ളവരുമായി മാത്രമാണ് ബന്ധം സ്ഥാപിക്കുന്നതെന്ന് ഉറപ്പുവരുത്താനും സഹായിക്കുന്നു.

SMMA നിയമം അനുസരിക്കുന്നതിനായി Snapchat ഓസ്‌ട്രേലിയൻ സർക്കാരുമായി ചേർന്ന് പ്രവർത്തിക്കുന്നത് തുടരും. എന്നാൽ യുവാക്കളുടെ ഓൺലൈൻ സുരക്ഷ ഉറപ്പാക്കുന്നതിന്, നിലവിലെ നിയമനിർവ്വഹണത്തിലുള്ള പോരായ്മകളെക്കുറിച്ച് ആഴത്തിൽ ചിന്തിക്കുകയും അവ പരിഹരിക്കാൻ ശ്രമിക്കുകയും ചെയ്യേണ്ടത് അത്യന്താപേക്ഷിതമാണെന്ന് ഞങ്ങൾ കരുതുന്നു.

16 വയസ്സിൽ താഴെയുള്ളയവരുടെ നിരോധനത്തെ ഞങ്ങൾ പിന്തുണയ്ക്കുന്നതുകൊണ്ടല്ല ആപ്പ് സ്റ്റോർ തലത്തിലുള്ള പ്രായപരിശോധനയ്ക്കായി ഞങ്ങൾ വാദിക്കുന്നത്, മറിച്ച് ഇത്തരമൊരു നയം നിലവിൽ വരികയാണെങ്കിൽ, അത് കൂടുതൽ ഗുണഫലങ്ങളും കുറഞ്ഞ ദോഷവശങ്ങളുമുള്ള ഒരു ഏകീകൃത രീതിയിൽ നടപ്പിലാക്കണം എന്നതുകൊണ്ടാണ് — 16 വയസ്സിൽ താഴെയുള്ളവരെ നിയന്ത്രിത ആപ്പുകളിൽ നിന്ന് അകറ്റി നിർത്തുന്നതോടൊപ്പം തന്നെ, അവർ സുരക്ഷിതമല്ലാത്ത മറ്റ് പ്ലാറ്റ്‌ഫോമുകളിലേക്ക് തള്ളപ്പെടില്ലെന്ന് ഉറപ്പാക്കുന്ന രീതിയിലായിരിക്കണം ഇത്. ഓസ്‌ട്രേലിയൻ യുവജനങ്ങൾ ഓൺലൈൻ സുരക്ഷയുടെ കാര്യത്തിൽ സമഗ്രമായ ഒരു സമീപനം അർഹിക്കുന്നു.